اۆسترالياداعى قورعاسىن زاۋىتى وسكەمەن مەتاللۋرگتەرى كومەگىمەن ىسكە قوسىلدى
ماسەلەن، وسكەمەندىك ماماندار اۆستراليادا قورعاسىن زاۋىتىن ىسكە قوستى. تيمۋر توقجىگىتوۆ وسكەمەندەگى قورعاسىن زاۋىتىنىڭ ديرەكتورى. جاستا بولسا ءوز ءىسىنىڭ جەتىك مامانى. جۇمىسىن قاراپايىم بالقىتۋشىدان باستاعان ول ولكەدەگى الىپ ونەركاسىپتە ءوزىن كورسەتە ءبىلدى. وسىلايشا 10 جىل ىشىندە ەڭ ۇزدىك قىزمەتكەرلەر قاتارىنا قوسىلدى. ايتۋىنشا، وسى ۋاقىت ىشىندە وندىرىستەگى تەحنولوگيا دا جاڭعىرعان. زاۋىت تولىقتاي سيفرلىق جۇيەگە تاۋەلدى بولىپ كەلەدى.
تيمۋر توقجىگىتوۆ، قورعاسىن زاۋىتىنىڭ ديرەكتورى:
- قازىر بارلىعىمىز ۇيالى تەلەفون قولداناتىمىز راس. سوندىقتان ءبىز وسى الىپ ءوندىرىس ورنىن اياداي تەلەفونعا سىيدىرساق دەيمىز. ياعني ونلاين رەجىمدە زاۋىتتاعى قاندايدا ءبىر اقالۋىقتاردىڭ سەبەبىن انىقتاۋ. سوندا جەدەل تۇردە ناقتى شەشىم قابىلداۋعا مۇمكىندىك مول.
الپاۋىت زاۋىتتاعى جۇمىستىڭ قارقىنى ءتىپتى شەتەلدىكتەردى دە تاڭداي قاقتىردى. سوندىقتان اۆستراليالىق ارىپتەستەر ولارعا ەرەكشە بۇيىمتاي دا ايتىپتى. قورعاسىن زاۋىتىن ىسكە قوسپاقشى بولعان ولار، وسكەمەندىك مەتاللۋرگتەردىڭ بىلىمىنە جۇگىنگەن. ويتكەنى وسكەمەندەگى ءوندىرىس الەمدە العاشقىلاردىڭ ءبىرى بولىپ، «ايزاسمەلت» تەحنولوگياسىن قولدانعان. بۇل ءوندىرىس قۋاتتىلىعىن 2 ەسە ارتتىرۋعا سەپتىگىن تيگىزدى. وسىنداي جەتىستىككە جەتكەن مەتاللۋرگتەر ءوتىنىش جاساعان وزگە كونتينەتتەگى ارىپتەستەرىنە ءوز بىلىمدەرىن ۇيرەتىپ قايتتى.
اندرەي گۋرين، اۋىسىم شەبەرى:
- ءبىز ءوزىمىزدىڭ يگەرگەن ايزا- پەشتەردەگى بالقىتۋ پروتسەستەرىنىڭ تەحنولوگياسىن ولارعا بۇگە- شىگەسىنە دەيىن تۇسىندىردىك. سونىمەن قاتار ارينە قۇرالداردى، قالدىق قۇياتىن ماشينالاردى باقىلاۋدا ۇستاۋدى، ولاردىڭ جۇمىسىن قالاي رەتتەۋ كەرەگىن دە ۇيرەتتىك. سول جاققا ىسساپارمەن بارىپ، ءبىلىم الماستىردىق.
وسىلايشا قازاقستاندىق قاراپايىم جۇمىسشىلاردىڭ قولداۋىمەن اۆسترالياداعى قورعاسىن زاۋىتى ءساتتى ىسكە قوسىلعان. بۇگىندە اتالعان ونەركاسىپ ۇلكەن قۋاتتىلىقپەن جۇمىس ىستەپ تۇر.