قاسىم- جومارت توقايەۆ نۇر- سۇلتان قالاسىنىڭ اكتيۆىمەن كەزدەستى
كەزدەسۋگە دەيىن قاسىم- جومارت توقايەۆ قالالىق ءماسليحاتتىڭ كەزەكتەن تىس وتىرىسىندا دەپۋتاتتارعا نۇر- سۇلتان قالاسىنىڭ اكىمى لاۋازىمىنا التاي كولگىنوۆتىڭ كانديداتۋراسىن ۇسىنىپ، ولاردىڭ كەلىسىمىن الدى.
قازاقستان پرەزيدەنتى شاھار اكتيۆىمەن كەزدەسۋدە بۇعان دەيىنگى نۇر- سۇلتان قالاسىنىڭ اكىمى باقىت سۇلتانوۆتىڭ اتقارعان جۇمىسىنا جوعارى باعا بەردى.
- قازاقستان رەسپۋبليكاسىنىڭ كونستيتۋتسياسىنا سايكەس، قالا اكىمى باقىت سۇلتانوۆتى قىزمەتىنەن بوساتۋ جونىندە شەشىم قابىلدادىم. الدىمەن باقىت تۇرلىحان ۇلىنا وسىنداي تاريحي ءارى جاۋاپتى كەزەڭدە وزىنە ارتىلعان سەنىمدى اقتاپ، تاپسىرىلعان مىندەتتى ابىرويمەن اتقارعانى ءۇشىن ريزاشىلىعىمدى بىلدىرەمىن، - دەدى مەملەكەت باسشىسى.
قاسىم- جومارت توقايەۆ قالانىڭ جاڭا اكىمىنىڭ الدىندا ماڭىزدى مىندەتتەر تۇرعانىن اتاپ ءوتتى.
- نۇر- سۇلتان قالاسىنىڭ اكىمى بولىپ التاي كولگىنوۆ تاعايىندالدى. ول ۇيىمداستىرۋشىلىق قابىلەتى مەن بىلىكتىلىگى جوعارى جاس مامان. باتىس قازاقستان وبلىسىندا بىرنەشە جىل تابىستى ەڭبەك ەتىپ، جەرگىلىكتى حالىقتىڭ الدىندا زور بەدەلگە يە بولدى. ونىڭ ءبىلىمى مەن تاجىريبەسىن ەسكەرە وتىرىپ، نۇر- سۇلتان قالاسىنىڭ اكىمى قىزمەتىنە تاعايىنداۋ تۋرالى شەشىم قابىلدادىم، - دەدى مەملەكەت باسشىسى.
قاسىم- جومارت توقايەۆ نۇر- سۇلتان قالاسىنىڭ اكتيۆىمەن كەزدەستى
قازاقستان پرەزيدەنتى حالىقتىڭ ءومىر ءسۇرۋ ساپاسىن ارتتىرۋ ماسەلەسىنە ەگجەي- تەگجەيلى توقتالدى.
- ازاماتتاردىڭ ءال- اۋقاتىن ارتتىرۋعا باسا ءمان بەرىلەتىن بولادى. جاقىن كۇندەرى تۇرعىنداردىڭ الەۋمەتتىك ماسەلەلەرىن شەشۋگە باعىتتالعان ماڭىزدى شەشىم قابىلدانادى. بۇل ۇدەرىستەردەن استانامىز قالىس قالماۋى كەرەك. كەرىسىنشە، الەۋمەتتىك ماسەلەلەردى شەشۋ ىسىندە الدىڭعى قاتاردا ءجۇرۋى قاجەت، - دەدى قاسىم- جومارت توقايەۆ.
جيىن سوڭىندا مەملەكەت باسشىسى جاڭا اكىمگە ءبىرقاتار ناقتى تاپسىرما بەردى.