اسقار مامين: ءبىلىم جانە عىلىم مينيسترلىگىنىڭ الدىندا اۋقىمدى مىندەتتەر تۇر

None
None
نۇر-سۇلتان. قازاقپارات - ق ر ۇكىمەتىنىڭ باسشىسى ق ر ءبىلىم جانە عىلىم مينيسترلىگىنىڭ ۇجىمىنا جاڭا ءمينيستردى تانىستىردى، دەپ حابارلايدى قازاقپارات primeminister.kz-كە سىلتەمە جاساپ.

ا. مامين اسحات ايماعامبەتوۆتىڭ ءبىلىم بەرۋ سالاسىندا ءتيىستى ءبىلىمى مەن ۇلكەن تاجىريبەسى بار ەكەنىن اتاپ ءوتتى. اسحات ايماعامبەتوۆ ءتۇرلى جىلدارى قاراعاندى وبلىسىنىڭ ءبىلىم باسقارماسىنىڭ باسشىسى، ءبىلىم جانە عىلىم ۆيتسە- ءمينيسترى قىزمەتتەرىن اتقاردى، قاراعاندى وبلىسى اكىمىنىڭ ورىنباسارى بولدى.

پرەمەر-مينيستر ءبىلىم جانە عىلىم مينيسترلىگىنىڭ الدىندا اۋقىمدى مىندەتتەر تۇرعانىن ايتتى. بۇل - مەكتەپكە دەيىنگى، ورتا، كاسىپتىك-تەحنيكالىق جانە جوعارى ءبىلىمدى جاڭعىرتۋ، سۇرانىسقا يە زاماناۋي ماماندار دايارلاۋ، ءبىلىم جانە عىلىمنىڭ ساپالى جۇيەسىن دامىتۋ.

سونداي-اق ۇكىمەت باسشىسى ق ر پرەزيدەنتىنىڭ جارلىعىمەن باسقا جۇمىسقا اۋىسۋىنا بايلانىستى ق ر ءبىلىم جانە عىلىم ءمينيسترى لاۋازىمىنان بوساتىلعان كۇلاش نوعاتاي قىزى ءشامشيدينوۆا جەمىستى جۇمىسى ءۇشىن العىس ءبىلدىرىپ، جاڭا ورىندا ساتتىلىك تىلەدى.

«كۇلاش نوعاتاي قىزى تاجىريبەسى مول باسشى. مينيستر قىزمەتىندە قارقىندى جۇمىس ىستەپ، ەلىمىزدىڭ ءبىلىم بەرۋ سالاسىنىڭ دامۋىنا ەلەۋلى ۇلەس قوستى»، - دەدى ق ر پرەمەر-ءمينيسترى.

سوڭعى جاڭالىقتار