09:27, 13 - ماۋسىم 2019 | GMT +6
انگليا مەن شوتلانديانىڭ اراسىنداعى تەمىرجولعا اعاش قۇلاپ، قاتىناس ءۇزىلدى
نۇر- سۇلتان. قازاقپارات - انگليا مەن شوتلانديانىڭ اراسىنداعى تەمىرجولدىڭ ەلەكتر سىمدارىنا اعاش قۇلاپ، پويىز قاتىناسى ءۇزىلىپ قالدى، دەپ حابارلايدى قازاقپارات Virgin Trains كومپانياسىنا سىلتەمە جاساپ.
وسى باعداردىڭ پويىز قاتىناسىن Virgin Trains كومپانياسى قامتاماسىز ەتەدى. وقىس وقيعا كارلايل (انگليا) جانە لوكەربي (شوتلانديا) ەلدى مەكەندەرىنىڭ اراسىنداعى ۋچاسكەدە بولعان. ۋچاسكە شوتلانديانىڭ باتىسىنداعى يرلاند تەڭىزىنىڭ جاعالاۋىنداعى اۋداندارعا قارايدى.
كەلەڭسىز جاعداي تابيعاتتىڭ توسىن مىنەزىنە بايلانىستى بولدى. قازىر بىرنەشە كۇننەن بەرى ۇلىبريتانيادا نوسەر تولاستاماي، سۋ تاسقىندارى بولىپ جاتىر. قورشاعان ورتانى قورعاۋ اگەنتتىگى انگليانىڭ وزىندە كەي اۋماقتاردى سۋ باسۋ ءقاۋپى تۋرالى 44 ەسكەرتۋ جاريالاعان.
ال شوتلانديانىڭ ابەردين قالاسىندا بەلگىلى ءانشى رود ستيۋارتتىڭ اشىق اسپان استىندا ءوتۋى ءتيىس كونتسەرتى كەيىنگە قالدىرىلدى.