استانالىق پوليتسەيلەر مەكتەپ تۇلەكتەرىنىڭ كەشتەرىنە قاتىسادى

نۇر-سۇلتان. قازاقپارات - نۇر-سۇلتان قالاسىنىڭ پوليتسەيلەرى مەكتەپتى ءبىتىرۋ كەشتەرىن وتكىزۋ كەزىندە ءتارتىپ پەن قاۋىپسىزدىكتى قاداعالايتىن بولادى.

بۇل تۋرالى ەلوردانىڭ پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات.

12-21 -ماۋسىم ارالىعىندا نۇر-سۇلتان قالاسىنىڭ بارلىق مەكتەپتەرىندە تۇلەكتەر كەشى وتەدى.

«وسىعان بايلانىستى، پوليتسيا قىزمەتكەرلەرى ءىس-شارالار وتكىزىلەتىن جەرلەردە قوعامدىق جانە جول قاۋىپسىزدىگىن ساقتاۋ مەن قامتاماسىز ەتۋ بويىنشا قاجەتتى شارالار قابىلداۋدا. ءار ءبىلىم بەرۋ ۇيىمىنا دەپارتامەنتتىڭ پوليتسيا قىزمەتكەرلەرى بەكىتىلگەن. قوعامدىق ءتارتىپتى كۇزەتۋمەن قاتار، مەكتەپتى ءبىتىرۋ كەشتەرىندە تىكەلەي ءىس- شارالار وتەتىن ورىنداردىڭ جانىندا پاترۋلدىك پوليتسيا ناريادتارى كەزەكشىلىك ەتەدى. جول جانە قوعامدىق قاۋىپسىزدىكتى 400 پوليتسيا مەن 40 اۆتوپاترۋل جۇزەگە اسىراتىن بولادى»، - دەدى دەپارتامەنتتەن.

ءمالىم ەتىلگەندەي، پوليتسەيلەر بۇعان دەيىن وقۋ ورىندارىنىڭ وقىتۋشىلار قۇرامىمەن كەزدەسىپ، نەگىزگى قاۋىپسىزدىك شارالارى تۋرالى اڭگىمەلەسۋ وتكىزگەن.

سونىمەن قاتار ءتارتىپ ساقشىلارى كامەلەتكە تولماعاندار تۇنگى ۋاقىتتا اتا-انانىڭ نەمەسە زاڭدى وكىلىنىڭ ەرىپ ءجۇرۋىنسىز ۇيىنەن تىس جەردە جۇرگەنى ءۇشىن اكىمشىلىك جاۋاپكەرشىلىك قاراستىرىلعانىن (ق ر ا ق ب ت ك-نىڭ 442-بابىنىڭ 1-بولىگى، 2-بولىگى، 3-بولىگى «كامەلەتكە تولماعانداردىڭ زاڭدى وكىلدەرىنىڭ ەرىپ ءجۇرۋىنسىز تۇنگى ۋاقىتتا تۇرعىن جايدان تىس جەردە بولۋى» (ەسكەرتۋدەن باستاپ ايىپپۇلعا دەيىن 15 ا ە ك) ەسكە سالدى.