جاقسىلىق ۇشكەمپىروۆ: قىزمەتكە كىرىسكەن پرەزيدەنت ۇلتتىق مۇددە مەن بىرلىككە ۇلكەن ءمان بەرىپ وتىر
«بۇگىن شىنىندا دا تاريحي كۇن بولىپ وتىر. سايلاۋدا جەڭىسكە جەتكەن قاسىم- جومارت توقايەۆتى اق كيىزگە كوتەرىپ، ۇلىقتادىق. وتە جاقسى ءراسىم جاسالدى. سوڭىنان مەملەكەت باسشىسىنىڭ ءسوزىن تىڭدادىق. ودان نە تۇيدىك؟ ەڭ ءبىرىنشى قازاقستاننىڭ الەمدىك ارەناداعى بەدەلى تومەندەمەيدى دەپ ويلايمىن، كەرىسىنشە توقايەۆتىڭ بەدەلى ارقىلى ول ارتادى. ول كىسى قازاقتىڭ ۇلتتىق مۇددەسىن الەمدىك ارەنادا دا، باسقا جەرلەردە دە قورعايتىنىن مالىمدەدى. ءبىز مىقتى مەملەكەت بولا الامىز. ەكىنشىدەن، ءبىزدىڭ جاستارعا ۇلكەن ءۇمىت ارتىلىپ وتىر. جاستار - ءبىزدىڭ كەلەشەگىمىز. وسى رەتتە ايتاتىنىم قازاق ەلى - ەشقاشان ەشكىمنەن كەم بولعان ەمەس. ونى سول دەڭگەيدە ۇستاپ تۇرۋ جاستاردىڭ قولىندا»، - دەدى جاقسىلىق ۇشكەمپىروۆ.
ونىڭ ايتۋىنشا، اۋىزبىرشىلىك بولعاندا عانا ۇلت تۇتاستاي تابىسقا جەتەدى. وتكەن تاريحتىڭ وزىندە دە اۋىزبىرشىلىگى بولعاندا قازاقتىڭ جاعدايى مىقتى، مەملەكەتى قۋاتتى بولعانىن كورسەتكەن.
«ەكىنشى جاعىنان جاستاردىڭ وزدەرى دە ەڭبەككەر بولۋى كەرەك. مەن وليمپاداعا چەمپيون بولعانىما كوپ جاستار قىزىعادى، ال وعان جەتۋدىڭ بىردەن ءبىر جولى - ەڭبەك. سونى ۇمىتپاسا ەكەن دەيمىن. ءبىراق، قالاي بولعاندا دا بىرلىك پەن ىنتىماق بولماي، ەلىمىز العا باسا المايدى. بىرلىگى مىعىم مەملەكەتتىڭ بولاشاعى دا باياندى»، - دەدى جاقسىلىق ۇشكەمپىروۆ.
اۆتور: قانات مامەتقازى ۇلى