توقايەۆ قوعامداعى ماسەلەلەردى تەرەڭ تۇسىنەتىنىن ۇقتىردى - باقىتجان جۇماعۇلوۆ
«ءبىز پرەزيدەنتتىڭ تانىستىرىلۋى سەكىلدى ماڭىزدى ءىس- شاراعا قاتىسىپ وتىرمىز. بۇل - بيلىكتىڭ بەيبىت تۇردە بەرىلۋى. حالىق قاسىم- جومارت توقايەۆقا داۋىس بەرىپ، ءوز كوزقاراسىن ءبىلدىردى. قاسىم- جومارت توقايەۆتىڭ ءسوز سويلەۋىندە بىرنەشە نەگىزگى باعىتتار ناقتى ايتىلدى. بۇل، ەڭ الدىمەن، ادامدارعا قامقورلىق دەر ەدىم. پرەزيدەنت قوعامىمىزدا بار ماسەلەلەردى، قيىندىقتاردى تەرەڭ تۇسىنەتىنىن ۇقتىردى. اڭگىمە ادامعا قامقورلىق، ونى جۇمىسقا ورنالاستىرۋ تۋرالى ايتىلىپ وتىر. ەكىنشىدەن، دەنساۋلىق جاعدايىنا بايلانىستى ەڭبەك ەتە المايتىن ادامدارعا قامقورلىق كورسەتىلمەك. ەڭ باستىسى - ادام كاپيتالى. دەنساۋلىق ساقتاۋ، ءبىلىم بەرۋ، پەداگوگتار مەن دارىگەرلەردىڭ مارتەبەسىن ارتتىرۋ - وسى بارلىق باعىتتار بويىنشا توقايەۆ مەملەكەتتى دامىتۋ كەرەكتىگىن تۇسىنەدى»، - دەدى باقىتجان جۇماعۇلوۆ ق ر پرەزيدەنتى ۇلىقتاۋ راسىمىنەن كەيىن سويلەگەن سوزىندە.
سپيكەر مەملەكەت باسشىسىنىڭ ەل جاستارىنا ارناعان ۇندەۋىنە دە توقتالدى.
«قاسىم- جومارت توقايەۆ جاستارعا، ونىڭ كەلەشەگىنە سەنىم ارتىپ وتىر. جاستاردىڭ كادرلىق رەزەرۆى قۇرىلۋى ءتيىس. جاستار قىزمەتتىك ساتىمەن وسەدى. ءبىز ەلىمىزدىڭ دامۋىنداعى جاڭا كەزەڭ - ادامدارعا قامقورلىق ۋاقىتى كەلگەنىن سەزىندىك»، - دەيدى ول.
سەناتور مەملەكەت باسشىسىنىڭ ءبىلىم جۇيەسىن جاڭعىرتۋ جونىندەگى يدەياسىن دا اينالىپ وتپەدى.
«الەم جىلدام وزگەرىپ بارادى. بارلىعى بىردەن بولا قويماسى انىق. ءبىراق، قاسىم- جومارت توقايەۆ بۇل سالانى تەرەڭ تۇسىنە وتىرىپ، ناقتى مىندەت قويىپ وتىر - ۇزدىك الەمدىك ستاندارتتار بويىنشا ءبىلىم بەرۋ جۇيەسىن جاڭعىرتۋ كەرەك. الايدا، ءبىلىم بەرۋدەگى ءبىزدىڭ ۇلتتىق جەتىستىكتەرىمىزدى ۇمىتپاۋ كەرەكتىگىن دە تىلگە تيەك ەتتى. پرەزيدەنت پەداگوگ مارتەبەسىن كوتەرۋ مىندەتىن ناقتى قويدى. ويتكەنى پەداگوگ قوعامدا ەرەكشە قۇرمەتكە يە بولۋى ءتيىس»، - دەدى ب. جۇماعۇلوۆ.
ايتا كەتسەك، ەلوردادا جاڭادان سايلانعان ق ر پرەزيدەنتى قاسىم- جومارت توقايەۆتى ۇلىقتاۋ ءراسىمى ءوتتى. ق. توقايەۆتى ۇلىقتاۋ راسىمىنە ۇكىمەت مۇشەلەرى، پارلامەنت دەپۋتاتتارى، كونستيتۋتسيالىق كەڭەس مۇشەلەرى، جوعارعى سوت سۋديالارى، قازاقستاندا تىركەلگەن ديپلوماتيالىق كورپۋس وكىلدەرى جانە باسقا دا شاقىرىلعان قوناقتار قاتىستى.
تاۋەلسىزدىك سارايىندا قاسىم- جومارت توقايەۆ قازاقستان حالقىنا انت بەردى. انت بەرگەن ساتتەن باستاپ جاڭادان سايلانعان پرەزيدەنت رەسمي قىزمەتىنە كىرىسكەن بولىپ سانالادى.
اۆتور: ايان بەكەن ۇلى