مۇعالىمدەر مەن دارىگەرلەردىڭ جاعدايىن جاقسارتۋعا مۇمكىندىكتەر جاسالادى - مەملەكەت باسشىسى

نۇر-سۇلتان. قازاقپارات - بۇگىن ۇلىقتاۋ راسىمىندە قازاقستان پرەزيدەنتى قاسىم-جومارت توقايەۆ ادىلەتتى الەۋمەتتىك ساياسات ماسەلەسىن كوتەردى، دەپ حابارلايدى قازاقپارات ءتىلشىسى.

«ءبىز ادام كاپيتالىن دامىتۋ ساياساتىن جالعاستىرامىز. بۇل باعىتتا ەڭ الدىمەن نە ىستەۋىمىز قاجەت؟ جاپپاي ءبىلىم بەرۋدى قولداۋ، بارلىق تۇرعىندارعا ساپالى مەديتسينالىق قىزمەت كورسەتۋ... مىنە وسى ماسەلەلەر بويىنشا ءبىزدىڭ تۇتاس باعىت- باعدارىمىز بار»، - دەدى پرەزيدەنت.

مەملەكەت باسشىسى مۇعالىمدەر مەن دارىگەرلەرگە قولداۋ جاسالاتىنىن اتاپ ءوتتى.

«ءبىز مۇعالىمدەردىڭ جانە دارىگەرلەردىڭ مارتەبەسىن كوتەرەتىن جاڭا زاڭدى قابىلدايمىز. ولاردىڭ قۇقىعىن قورعاپ، ماتەريالدىق جاعدايىن جاقسارتۋ ءۇشىن ءتيىستى مۇمكىندىكتەر جاسايمىز»، - دەدى ق. توقايەۆ.