ءاردايىم قازاقستاننىڭ ۇلتتىق مۇددەسىن قورعايمىن - قاسىم-جومارت توقايەۆ
«سايلاۋ كامپانياسى كەزىندە مەن ەلىمىزدىڭ ءبىرشاما وڭىرلەرىن ارالادىم. مەنىڭ ساياسي پلاتفورمام - ءبىزدىڭ ازاماتتاردىڭ باستى تالاپتارىنا جاۋاپ بولادى. ەڭ الدىمەن، مەن قازاقستاننىڭ ءۇشىنشى جاڭعىرۋى باعىتىندا، بەس ينستيتۋتسيونالدىق رەفورمانى جۇزەگە اسىرۋ مەن ءبىزدىڭ مەملەكەتتىڭ باسقا دا ستراتەگيالىق ماڭىزدى جۇمىستارىمەن اينالىسامىن. باسقا ايتقاندا، مەن ەلباسىنىڭ ستراتەگياسىن جۇزەگە اسىرۋ ءۇشىن جۇمىس ىستەيمىن»، - دەدى قاسىم-جومارت توقايەۆ.
مەملەكەت باسشىسى ءوز سوزىندە مەملەكەت دامۋدىڭ جاڭا دەڭگەيىنە شىعۋ ءۇشىن جاڭا امالدار مەن شەشىمدەر كەرەكتىگىن تىلگە تيەك ەتتى.
«ولاردىڭ بارلىعى جاقىندا جاريالانادى. ەكىنشىدەن، وتكىر الەۋمەتتىك ماسەلەلەرمەن، بارىنشا مۇقتاج جاندارعا كومەكتەسۋ ىسىمەن اينالىسۋدى كوزدەپ وتىرمىن. ۇكىمەتكە بۇل سالادا ۇزدىك ناتيجەگە جەتۋ امالدارى تاپسىرىلدى. بىزگە الەۋمەتتىك ساياساتتى سالماقتى تۇردە جاڭارتۋ كەرەك. ۇشىنشىدەن، قازاقستاندىق كاسىپكەرلەرگە قولداۋ بىلدىرەمىن. ينۆەستيتسيا تارتۋ مەن ولاردى قورعاۋ، ىسكەرلىك بەلسەندىلىكتى جىگەرلەندىرۋ، ورتا كلاستى قالىپتاستىرۋ كوزدەلەدى. تورتىنشىدەن، مەنىڭ ماقساتىم - قوعامنىڭ بىرلىگىن قامتىپ، ءاربىر ازاماتتىڭ قۇقىعىن قورعاۋ. ەڭ باستىسى - ءاردايىم قايدا بولماسىن قازاقستاننىڭ ۇلتتىق مۇددەسىن قورعايتىن بولامىن»، - دەدى پرەزيدەنت.
ايتا كەتسەك، ەلوردادا جاڭادان سايلانعان ق ر پرەزيدەنتى قاسىم-جومارت توقايەۆتى ۇلىقتاۋ ءراسىمى ءوتىپ جاتىر. ق. توقايەۆتى ۇلىقتاۋ راسىمىنە ۇكىمەت مۇشەلەرى، پارلامەنت دەپۋتاتتارى، كونستيتۋتسيالىق كەڭەس مۇشەلەرى, جوعارعى سوت سۋديالارى، قازاقستاندا تىركەلگەن ديپلوماتيالىق كورپۋس وكىلدەرى جانە باسقا دا شاقىرىلعان قوناقتار قاتىسۋدا.
تاۋەلسىزدىك سارايىندا قاسىم- جومارت توقايەۆ قازاقستان حالقىنا انت بەردى. انت بەرگەن ساتتەن باستاپ جاڭادان سايلانعان پرەزيدەنت رەسمي قىزمەتىنە كىرىسكەن بولىپ سانالادى.