مەملەكەت باسشىسى قاسىم-جومارت توقايەۆ قازاقستان حالقىنا انت بەردى

نۇر-سۇلتان. قازاقپارات - استاناداعى تاۋەلسىزدىك سارايىندا ءوتىپ جاتقان جاڭادان سايلانعان قازاقستان پرەزيدەنتى قاسىم-جومارت توقايەۆتى ۇلىقتاۋ راسىمىندە مەملەكەت باسشىسى قازاقستان حالقىنا انت بەردى، دەپ حابارلايدى قازاقپارات ءتىلشىسى.

اتاپ ايتقاندا، ۇلىقتاۋ ءراسىمى وتەتىن سالتاناتتى زالعا ەڭ الدىمەن قازاقستان رەسپۋبليكاسىنىڭ تۋى، شتاندارتى مەن كونستيتۋتسياسى اكەلىندى.

زاڭعا سايكەس، قازاقستان پرەزيدەنتى قاسىم-جومارت توقايەۆ كونستيتۋتسياعا قولىن قويىپ تۇرىپ: «قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن»، - دەپ حالىققا انت بەردى.

وسى ساتتەن باستاپ پرەزيدەنت رەسمي قىزمەتىنە كىرىسكەن بولىپ سانالادى.

انت بەرىلگەننەن كەيىن قازاقستان رەسپۋبليكاسىنىڭ مەملەكەتتىك گيمنى ورىندالدى. سونىمەن قاتار، ورتالىق سايلاۋ كوميسسياسىنىڭ ءتوراعاسى مەملەكەت باسشىسىنا قازاقستان رەسپۋبليكاسى پرەزيدەنتىنىڭ كۋالىگىن تاپسىردى.

ەسكە سالا كەتەيىك، ق ر ورتالىق سايلاۋ كوميسسياسىنىڭ شىعارعان قورىتىندىسىنا سايكەس، 9 -ماۋسىمداعى كەزەكتەن تىس پرەزيدەنتتىك سايلاۋدا كانديدات قاسىم-جومارت توقايەۆ سايلاۋشىلاردىڭ 70,96 پروتسەنت داۋىسىن (سايلاۋشىلاردىڭ 6539715 داۋىسى) الىپ، جەڭىسكە جەتكەن بولاتىن. وسىعان بايلانىستى ورتالىق سايلاۋ كوميسسياسى ق ر پرەزيدەنتىنىڭ انت بەرۋ كۇنىن 12 -ماۋسىمعا بەلگىلەۋ تۋرالى ارنايى قاۋلى قابىلدادى.