ەلوردادا جاڭادان ەكى ساياباق سالىنادى

نۇر- سۇلتان. قازاقپارات - باس قالادا تاعى ەكى جاڭا ساياباق پايدا بولادى. بۇل تۋرالى قالا اكىمى باقىت سۇلتانوۆ ءمالىم ەتتى، دەپ حابارلايدى قازاقپارات.

«جاقىندا نۇر- سۇلتان تۇرعىندارى تاعى دا جاڭادان اشىلاتىن ەكى ساياباقتا سەرۋەندەيتىن بولادى. ءبىز ول ساياباقتاردى بەيبىتشىلىك جانە كەلىسىم سارايىنان باستاپ «نۇرلى جول» ۆوكزالىنا دەيىن 6 شاقىرىمدى الىپ جاتقان «مىڭجىلدىق» اللەياسىنىڭ بويىندا ورنالاسۋىن جوسپارلادىق»، - دەپ جازدى ب. سۇلتانوۆ ءوزىنىڭ facebook پاراقشاسىندا.

 ونىڭ ايتۋىنشا، «مىڭجىلدىق» اللەياسى «نۇرجول» بۋلۆارى، پرەزيدەنت ساياباعى، بايتەرەك، عاشىقتار ساياباعى ارقىلى قالانىڭ ورتالىق بەلدىگىن جالعاستىراتىن ۇلكەن ءارى دەمالۋشىلارعا ىڭعايلى جاسىل ساياباققا اينالاتىن بولادى.

 «بۋلۆاردىڭ ناق ورتاسىندا ورنالاساتىن جاڭا قازاق دراما تەاترى وسى جەردىڭ ەڭ باستى نىسانى بولماق. ال ونى بويلاي ۇلتتىق، ازيالىق جانە ەۋرازيالىق ساۋلەت ستيلىندە تۇرعىن ۇيلەر سالىنادى. اللەيانىڭ ورتالىق بۋلۆارىن جوبالاۋ بويىنشا بايقاۋ جاريالاندى. سول سياقتى قالا قۇرىلىسىنىڭ كەڭەسىندە ونى اينالا قورشايتىن تۇرعىن ءۇي كەشەندەرىنىڭ جوبالارىن قارالدى. «مىڭجىلدىق» اۋدانىنىڭ جاڭا كەلبەتىنە قالا تۇرعىندارى ءوز باعاسىن بەرەتىنىنە سەنىمدىمىن»، - دەيدى ول.

قالا اكىمىنىڭ مالىمەتىنە سۇيەنسەك، «مىڭجىلدىق» اللەياسىنىڭ اۋماعى 1,2 مىڭ گەكتارعا جۋىق جەردى قامتيدى. جانە بۇگىندە ونىڭ 10 پايىزى يگەرىلىپ، ودان بولەك، ول جەرگە جول جانە ينجەنەرلىك جەلىلەردىڭ 50 پايىزى تارتىلدى.

اۆتور: داۋلەت ىزتىلەۋ