جاپوندىقتار ادامنىڭ كوڭىل- كۇيىن باسقاراتىن قۇرىلعى ويلاپ تاپتى

 نۇر- سۇلتان. قازاقپارات - قۇراستىرۋشىلاردىڭ ايتۋىنشا، بۇل قۇرىلعى عيمارات ىشىندە وتىراتىن ادامداردىڭ كوڭىل- كۇيىن كوتەرۋگە كومەكتەسەدى.

جاپونيانىڭ "Japan Display" كومپانياسى ادامنىڭ كوڭىل- كۇيىن باسقارا الاتىن قۇرىلعى جاساپ شىعاردى.

كۇيتاباق قۇرىلعىسىنا ۇقسايتىن ديەۆايستان ءبىر ۋاقىتتا ءان تىڭداپ، دوڭگەلەك ديسپلەي ارقىلى سۋرەت قاراۋعا بولادى. كەرەك دەسەڭىز، سۋرەت پەن ورىندالعان انگە قاتىستى ءيىس تە شىعارا الادى ەكەن. قۇرىلعىنىڭ سىرتقى كورپۋسى اعاشتان جاسالعان. ديەۆايستىڭ بىرنەشە جەردە ارنايى تۇتىكشەلەرى بار. بۇل تەسىكتەر ءيىس شىعارۋعا ارنالعان.

Multi Sensory Device XVG-01 دەپ اتالاتىن قۇرىلعى ماۋسىمنىڭ 11-12 - ارالىعىندا قىتايدىڭ شانحاي قالاسىندا وتەتىن CES Asia 2019 كورمەسىندە كوپشىلىككە تانىستىرىلادى. قۇراستىرۋشىلاردىڭ ايتۋىنشا، بۇل قۇرىلعى عيمارات ىشىندە وتىراتىن ادامداردىڭ كوڭىل- كۇيىن كوتەرۋگە كومەكتەسەدى. XVG-01 2019 -جىلدىڭ سوڭىندا جاپونيادا قولدانىسقا ەنەدى دەپ جوسپارلانعان. ال سىرت مەملەكەتتەرگە قاشان ەكسپورتتالاتىنى ءالى بەلگىلەنگەن جوق.