ەلوردادا «اسىل انا» كوپبالالى انالاردىڭ بايقاۋى وتەدى
«بۇگىن كوپبالالى انالارعا ارنالعان تەگىن قولدانبالى ونەر مەن قولونەر شەبەرلىگىن وقىتۋ سەمينارىنىڭ قاتىسۋشىلارىن ماراپاتتاۋ راسىمىنە قاتىستىم. وقىتۋ سەمينارلارى مەن شەبەرلىك وقۋلارىنان ءساتتى وتكەن انالارعا ارنايى 50 تىگىن ماشيناسى سىيعا تارتىلدى.
سەميناردى تانىمال ەتنوديزاينەر ىرزا تۇرسىنزادا باستاعان كاسىبي ماماندار جۇرگىزدى. جالپى، «اسىل انا» جوباسى بىرنەشە كەزەڭنەن تۇرادى. ونىڭ ءارقايسىسى انالاردىڭ الەۋەتىن جان- جاقتى اشۋعا باعىتتالعان»، - دەپ جازدى قالا اكىمىنىڭ ورىنباسارى ەرلان كاناليموۆ Facebook-تەگى پاراقشاسىندا.
ونىڭ ايتۋىنشا، سەمينار كەزىندە كوپبالالى انالار ارنايى تاپسىرمالاردى ورىنداپ، بوس ورىندار جارمەڭكەسىنە قاتىسقان.
«6 -شىلدە - قالا كۇنى مەرەكەسى قارساڭىندا «اسىل انا» بايقاۋى وتەدى. وعان شەبەرلىك ساباعىنان وتكەن كوپبالالى انالار قاتىسادى. ولار قاجەتتى ماتەريالدارمەن، تىگىن ماشينالارىمەن قامتاماسىز ەتىلەتىن بولادى. بايقاۋعا انالار ءوز قولدارىمەن جاسالعان بۇيىمدارىن ۇسىنادى. بۇل بۇيىمداردىڭ بارلىعى ارنايى ۇلكەن كورمەگە قويىلماق.
جەڭىمپازدار ديپلومدارمەن جانە جوبانى قولداعان مەتسەناتتار، دەمەۋشىلەر تاعايىنداعان باعالى سىيلىقتارمەن ماراپاتتالادى»، - دەدى ول.
سونداي-اق، قالا اكىمى ورىنباسارىنىڭ مالىمدەۋىنشە، جوبانىڭ سوڭعى كەزەڭىندە «اسىل انا» كوپبالالى انالاردى قولداۋ ورتالىعىن قۇرۋ جوسپارلانىپ وتىر. وندا انالارعا قۇقىقتىق، پسيحولوگيالىق، كاسىبي كەڭەستەر بەرىلەدى. ورتالىقتىڭ تاعى ءبىر ەرەكشە قىزمەتى - انالارعا جۇمىسقا تۇرۋعا كومەكتەسەدى.
ودان بولەك، انالاردىڭ بالا كۇتۋىنە ىڭعايلى بولۋى ءۇشىن شاعىن بالاباقشا ۇيىمداستىرىلاتىن بولادى.
