الاياقتىق جاساعان ەكى باسشىعا ءىرى كولەمدە ايىپپۇل سالىندى

نۇر-سۇلتان. قازاقپارات - اقتوبە قالالىق پوليتسيا ءبولىمى باستىعىنىڭ ورىنباسارى جانە پاۆلودار وبلىسىنىڭ توتەنشە جاعدايلار دەپارتامەنتى باسقارماسىنىڭ بۇرىنعى باستىعى الاياقتىق ءۇشىن ءارتۇرلى ايىپپۇلدارعا تارتىلدى، دەپ حابارلايدى قازاقپارات ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنە سىلتەمە جاساپ.

«سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ اقتوبە وبلىسى بويىنشا دەپارتامەنتى بۇرىن اقتوبە قالاسى استانا اۋدانىنىڭ №2-قالالىق پوليتسيا ءبولىمى باستىعىنىڭ ورىنباسارى، پوليتسيا مايورى

ە. انەتبايەۆقا، وسى ءبولىمنىڭ اعا جەدەل ۋاكىلى، پوليتسيا كاپيتانى ا. شولاقوۆقا جانە وسى ءبولىمنىڭ جەدەل ۋاكىلى، پوليتسيا اعا لەيتەنانتى ە. قالدىبايەۆقا قاتىستى سوتقا دەيىنگى تەرگەۋدى اياقتادى»، دەلىنگەن حابارلامادا.

اتالعان تۇلعالار «ا» ازاماتىنا قاتىستى قىلمىستىق ءىستى قىسقارتۋ تۋرالى ءوز قۇزىرەتىنە كىرمەيتىن ماسەلەنى شەشۋ ءۇشىن الداۋ جولىمەن د. رىسپاعامبەتوۆتەن 300 مىڭ تەڭگە العان.

29 -مامىردا اقتوبە قالاسىنىڭ №2-سوتىندا ولار الاياقتىق جاساعانى ءۇشىن مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلا وتىرىپ، ە. انەتبايەۆقا - 2,9 ميلليون تەڭگە، ا. شولاقوۆقا - 3 ميلليون تەڭگە جانە ە. قالدىبايەۆقا - 2,5 ميلليون تەڭگە ايىپپۇل سالىندى. سوتتالعاندار ارنايى پوليتسيا شەندەرىنەن ايىرىلدى.

ءبىر كۇن كەيىنىرەك، 30 -مامىر كۇنى پاۆلودار قالاسىنىڭ №2-سوتىنىڭ ۇكىمىمەن وبلىستىق توتەنشە جاعدايلار دەپارتامەنتى باسقارماسىنىڭ بۇرىنعى باستىعى س. ىسقاقوۆ الاياقتىق جاساعانى ءۇشىن كىنالى دەپ تانىلدى.

ۇلتتىق بيۋرونىڭ پاۆلودار وبلىسى بويىنشا دەپارتامەنتىنىڭ سوتقا دەيىنگى تەرگەۋ ماتەريالدارىنا سايكەس س. ىسقاقوۆ ساۋدا ءۇيىنىڭ وكىلىنەن الداۋ جولىمەن 500 مىڭ تەڭگە العان. اقشا اكىمشىلىك قۇقىق بۇزۋشىلىق تۋرالى ماتەريالدى مامانداندىرىلعان ەكونوميكالىق سوتقا جىبەرمەۋ تۋرالى ءوزىنىڭ قۇزىرەتىنە كىرمەيتىن ماسەلەنى شەشۋى ءۇشىن الىنعان.

ول الاياقتىق جاساعانى ءۇشىن مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرىلا وتىرىپ، 5 ملن تەڭگە كولەمىندە ايىپپۇل سالىندى.

سونداي-اق ول ازاماتتىق قورعاۋ پودپولكوۆنيگى ارنايى شەنىنەن ايرىلدى.

سوت ە. انەتبايەۆقا، ا. شولوحوۆقا جانە ە. قالدىبايەۆقا قاتىستى ۇكىم زاڭدى كۇشىنە ەنگەن كۇننەن باستاپ ون بەس تاۋلىك ىشىندە، س. ىسقاقوۆقا - ءبىر اي ىشىندە ايىپپۇل تولەۋ مەرزىمىن بەلگىلەدى. سوت جازالانعانداردىڭ ايىپپۇلدارىن تولەمەگەن جاعدايدا جازا باس بوستاندىعىنان ايىرۋعا اۋىستىرىلاتىنى ءتۇسىندىرىلدى.