تارازدا سەگىز ەلدىڭ كارديوحيرۋرگتارى باس قوستى

تاراز. قازاقپارات - تارازدا قازاقستان، رەسەي، ۋكراينا، وزبەكستان، قىرعىزستان، تۇرىكمەنستان، گەرمانيا جانە اۋستريا كارديوحيرۋرگتارى قاتىسقان حالىقارالىق عىلىمي- تاجىريبەلىك كونفەرەنسياسى ءوتتى، دەپ حابارلايدى قازاقپارات.

كونفەرەنسيانىڭ سالتاناتتى اشىلۋ راسىمىنە جامبىل وبلىسى اكىمىنىڭ ورىنباسارى ەركەبۇلان داۋىلبايەۆ، تاراز قالاسىنىڭ اكىمى قايرات دوسايەۆ جانە قازاقستان رەسپۋبليكاسى دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى اسقار حوروشاش جانە وزگە دە قۇرمەتتى قوناقتار قاتىستى.

ءۇش كۇنگە سوزىلعان شارادا شەتەلدىك ماماندار كۇردەلى وپەراتسيالار ارقىلى وزدەرىنىڭ تاجىريبەلىك ىستەرىمەن ءبولىستى. ايتالىق، ءبىرىنشى كۇن كىشكەنتاي تىلىك جاساۋ ارقىلى تامىرلاردىڭ زاقىمدانۋى كەزىندە ميوكاردتى ريەۆاسكۋلياريزاتسيالاۋ وتاسى ءساتتى ءوتتى. بۇل شەبەرلىك ساعاتىن ۋكراينانىڭ كييەۆ قالاسىنداعى دوبروبۋت كلينيكاسىنىڭ پروفەسسورى الەكساندر بابلياك باستاعان كارديوحيرۋرگتەر بريگاداسى وتكىزدى. ال كەلەسى كۇنى «جۇرەكشە ارالىق قالقانىڭ اقاۋىن توراكوسكوپيالىق جابۋ» وپەراتسياسىن تارازدىق كارديوحيرۋرگيا جانە ترانسپلانتولوگيا عىلىمي- كلينيكالىق ورتالىعىنىڭ كارديوحيرۋرگى يكرومجون مۋحامەدوۆ باستاعان ءبىر توپ دارىگەر جاساپ شىقتى. سونداي- اق، ءۇشىنشى كۇنى 3D فورماتىنداعى ميترالدى اقاۋلاردى توراكوسكوپيالىق تۇزەتۋ وپەراتسياسىن پروفەسسور ليۋدۆيگ ميۋللەر (ينسبۋرك ق. اۆستريا) جۇرگىزدى.

 «كونفەرەنسيا تاقىرىبى - «Fast Track - Cardiosurgery»  كەزدەيسوق تاڭدالماعان. كوپ جىلدىق تاجىريبە كورسەتكەندەي، وتا جاسالعان ناۋقاستىڭ اعزاسى سترەستىك رەاكسيالارعا ۇشىرايدى. سوندىقتان انەستەزيادان كەيىنگى ويانۋ، قايتا قالىپقا كەلۋ وتە كوپ ۋاقىتتى الادى. Fast Track تۇجىرىمداماسى حيرۋرگيالىق ارالاسۋدان كەيىن اعزانى تەزىرەك قالپىنا كەلتىرۋگە باعىتتالعان. Fast Track - Cardiosurgery  جاڭا باعىتى بۇگىندە ۋاقىت تالابى بولىپ تابىلادى»، - دەدى اسقار حوروشاش.

سونداي- اق، ءوز سوزىندە ەركەبۇلان داۋىلبايەۆ وڭىرلىك مەديتسينانىڭ، سونىڭ ىشىندە كارديولوگيالىق قىزمەتتىڭ جەتىستىكتەرىن اتاپ ءوتتى. ولار وبلىس تۇرعىندارىنا جوعارى مامانداندىرىلعان كارديولوگيا، كارديوحيرۋرگيا جانە ينتەرۆەنتسيالىق كارديولوگيا اياسىندا دەرتى اسقىنعان ناۋقاستارعا حيرۋرگيالىق ارالاسۋلار جاساپ، مۇمكىندىگىنشە تۇرعىنداردىڭ ءومىر جاسىن ۇزارتۋعا، ءولىم، مۇگەدەكتىك كورسەتكىشتەرىنە جول بەرمەۋ جولىندا تەر توگىپ كەلە جاتقان «عىلىمي- كلينيكالىق كارديوحيرۋرگيا جانە ترانسپلانتولوگيا ورتالىعىنىڭ» بۇل باعىتتا اتقارىپ وتىرعان قىزمەتىنە ايرىقشا قۇرمەت كورسەتتى.

اۆتور: عيبرات سەمباي