اتىراۋ وبلىسىندا تاعى ءبىر تۇشى سۋ كوزى تابىلدى
ماماندار دا زەرتتەۋ جۇمىستارىنا كىرىسكەن. ەگەر جەراستى سۋىنىڭ قورى انىقتالىپ، تۇرعىنداردىڭ يگىلىگىنە بەرىلەر بولسا، بۇعان دەيىن تەك قانا قۇبىر سۋىن پايدالانىپ كەلگەن شارۋاشىلىقتار ءۇشىن ۇلكەن قۋانىش بولعالى تۇر. ۇزىندىعى ەكى ءجۇز، ەنى ءجۇز مەتر كولشىكتىڭ تەرەڭدىگى ازىرگە تىزەدەن كەلەدى. ماماندار شامامەن 5 مىڭ تەكشە مەتر سۋ جينالدى دەگەندى ايتادى. ول ماقات اۋدانى ەسكەنە اۋىلىنان 5 شاقىرىمداي قاشىقتىقتا ورنالاسقان.
كولشىكتىڭ پايدا بولۋ سىرىن قۇزىرلى ورگاندار ءارتۇرلى توپشىلايدى. قازىردىڭ وزىندە بۇل ارانى اۋىل مالى مەن قاز- ۇيرەكتەر مەكەندەپ الىپتى.
ءلاززات قالماعانبەتوۆا، جايىق- كاسپي باسسەيندىك ينسپەكسياسىنىڭ باس مامانى:
- بۇل بەلگىسىز سۋ كوزى قانداي جولمەن شىعىپ جاتقاندىعى انىقتالعان جوق. ول جەراستى سۋى بولۋى مۇمكىن. وبلىستىق ەكولوگيا دەپارتامەنتىنىڭ ماماندارى سۋدان سىناما الىپ، زەرتتەۋگە كىرىستى.
جولداسقالي تەلاعىسوۆ، وبلىستىق ەكولوگيا دەپارتامەنتى ءبولىمىنىڭ مەڭگەرۋشىسى:
- سۋدىڭ قۇرامىندا قانداي زياندى زاتتار بار ەكەنىن، اۋىر مەتالدار مەن تۇزدىلىعىن جانە تاعى دا باسقا قۇرىلىمداردى انىقتاۋعا جىبەرەمىز. ماقات اۋدانىنداعى ونداعان شارۋاشىلىق تۇشى سۋ كوزىنىڭ بولماۋىنان مالدارىن كورشىلەس قىزىلقوعا اۋدانىندا باعادى. ەندى مىنا كول كادەگە اسار بولسا، شارۋاعا دا، مالعا دا ىرىس بولعالى تۇر.
عازيز عابدۋللين، شارۋا قوجالىعىنىڭ جەتەكشىسى:
- ارينە بۇل قۋانىشتى جاعداي. ماقات اۋدانىندا مال شارۋاشىلعىمەن اينالىسىپ وتىرعان كاسىپكەرلەر جەتەرلىك. وتىز- قىرىق كاسىپكەر بار. ولارعا وسى جەردەن جەر تەلىمىن بەرىپ، سۋدىڭ پايداسىن كورۋگە ابدەن بولادى.
قالاي دەگەنمەن دە، ءشول دالانىڭ بەتىنە شاپشىپ شىققان بۇل تىرشىلىك ءنارى گيدروگەولوگتاردى ۇلكەن ۇمىتكە باستاپ وتىر. سەبەبى اتىراۋ وبلىسى تەك مول مۇناي- گاز قورىمەن عانا ەمەس، تۇشى سۋدىڭ دا ۇلكەن كوزىن تابۋعا بولاتىنداي. ولاي بولعان جاعدايدا، وسى وڭىردە مال شارۋاشىلىعى وركەندەپ، شارۋالاردىڭ ايى وڭىنان تۋارى انىق.
www.24.kz