ەلىمىزدە العاش رەت سويانىڭ جاڭا سورتى ەگىلدى
بۇل تۋرالى ۇكىمەتتە وتكەن باسپا ءسوز ءماسليحاتىندا اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ مالىمدەدى. ايتۋىنشا، بۇل جولعى ءونىم كەلەسى جىلعا تۇقىم رەتىندە پايدالانىلادى. سونداي- اق، كەلەسى ەگىن ناۋقانىندا 150 مىڭ گەكتار جەرگە سويا ەگۋ جوسپاردا بار. سەبەبى بۇل داقىل ۇلكەن سۇرانىسقا يە.
«سولتۇستىك سويا» باعدارلاماسى جۇزەگە اسسا، 5 جىل ىشىندە وسى ءونىم القابى 1,5 ميلليون گەكتارعا جەتەدى. ءتىپتى، گەكتارىنا 25 سەنتنەرگە دەيىن ءونىم الۋعا بولادى. ايتا كەتۋ كەرەك، جالپى بيىلعى ەگىستىك ناۋقانىنا قازىنادان 60 ميلليارد تەڭگە قاراجات بولىنگەن.
ايداربەك ساپاروۆ، ق ر اۋىل شارۋاشىلىعى ءمينيسترىنىڭ ءبىرىنشى ورىنباسارى:
- جالپى ەگىس القابى 19 ميلليون گەكتاردى قۇراپ، ونىڭ ىشىندە ءداندى داقىلدار 14,5 ميلليون گەكتار، مايلى داقىلدار 2,7 ميلليون گەكتار، كوكونىس جانە باقشا داقىلدارى، كارتوپ 458 مىڭ گەكتار، مال ازىعى داقىلدارى 1,2 ملن گەكتار، تەحنيكالىق داقىلدار ونىڭ ىشىندە قىزىلشا، ماقتا 144 مىڭ گەكتار القاپتى قامتىدى.