تابىسقا جەتكەن شەتەلدەگى قازاقتار تۋرالى ارنايى تەلەجوبا باستالادى

نۇر-سۇلتان. قازاقپارات - اقپارات جانە قوعامدىق دامۋ ءمينيسترى داۋرەن ابايەۆ ميۋنحەن قالاسىندا وتەتىن دۇنيەجۇزى قازاقتارىنىڭ كىشى قۇرىلتايىنىڭ كۇنتارتىبىندە قانداي ماسەلەلەر قارالاتىنىن ايتىپ بەردى، دەپ حابارلايدى قازاقپارات ءتىلشىسى.

«شىنىندا دا، قۇرىلتايدىڭ كۇن ءتارتىبى وتە تىعىز ءارى قىزىقتى. ۇيىمداستىرۋشىلىق سيپاتتاعى ءبىرقاتار ماسەلەلەردى شەشۋ جۇمىسى تۇر. ولار ەڭ الدىمەن، بايلانىستاردى نىعايتىپ، الەمنىڭ تۇكپىر-تۇكپىرىندەگى دياسپورالاردىڭ «وتانداستار» قورىمەن، دۇنيەجۇزىلىك قازاقتار قاۋىمداستىعىمەن قارىم-قاتىناسىن كۇشەيتۋگە باعىتتالعان. ول جەردە ءبىزدىڭ شەتەلدەگى وتانداستارىمىزدى قولداۋعا باعىتتالعان زاڭنامالىق باستامالار تالقىلانىپ، ءبىلىم جانە تۋريستىك سالاداعى باعدارلامالار جۇزەگە اسىرىلاتىن بولادى. قازاق ءتىلىنىڭ قولدانىس اياسىن كەڭەيتۋ ماسەلەسى قاۋزالادى. بيزنەس-جوبالاردى ىسكە اسىرۋ ماسەلەسى كوتەرىلەدى»، - دەدى داۋرەن ابايەۆ حابار ارناسىنداعى «اشىق ديالوگ» باعدارلاماسىندا.

مينيستر سونىمەن قاتار شەتەلدەگى قازاق جاستارى ءۇشىن قازاقستاندىق جوعارعى وقۋ ورىندارىنىڭ كورمەسى ۇيىمداستىرىلاتىنىن ايتىپ ءوتتى.

«تۇڭعىش رەت كىشى قۇرىلتاي اياسىندا وتاندىق جانە شەتەلدىك بيزنەسمەندەردىڭ قاتىسۋىمەن بيزنەس-فورۋم وتەدى. سونداي-اق، قازاق دياسپوراسى وكىلدەرىنىڭ تابىسقا جەتۋ جولدارى تۋرالى تەلەجوبا باستاعالى وتىرمىز. جوعارى جەتىستىكتەرگە جەتكەن قانداستارىمىز كوپ. ولاردىڭ ءومىرى شىنىندا دا، جىگەر بەرەدى. ماسەلەن، نازاربايەۆ ۋنيۆەرسيتەتىندە عىلىم دوكتورى، پروفەسسور ءدوربوتحان سۇراعان اتتى ازامات جۇمىس ىستەيدى. كەزىندە موڭعوليادا مال باعىپ، قازاقى ورتادا وسكەن ول ءۇشىن مەكتەپكە (موڭعول تىلىندەگى مەكتەپكە) بارۋ قيىنعا تۇسكەن. 2005 -جىلى ول تاريحي وتانىنا ورالىپ، ءال-فارابي اتىنداعى قاز ۇ ۋ-دا ءبىلىم العان. نيۋ-يوركتەگى ۋنيۆەرسيتەتتە ءبىلىمىن شىڭداعان. لوندونداعى پاتشايىمدىق كوللەدجىنەن ماگيستر دارەجەسىن العان. ال بۇگىن ول الەمنىڭ ەڭ تابىستى ماتەماتيكتەرىنىڭ بىرىنە اينالدى. وسىنداي ازاماتتاردىڭ ءومىرىن كوپشىلىك ءبىلۋى كەرەك»، - دەدى داۋرەن ابايەۆ.

ەسكە سالا كەتسەك، 2019 -جىلدىڭ 7-9 -ماۋسىمدا گەرمانيا فەدەراتيۆتىك رەسپۋبليكاسىنىڭ ميۋنحەن قالاسىندا دۇنيەجۇزى قازاقتارىنىڭ كىشى قۇرىلتايى وتەتىنىن بۇعان دەيىن حابارلاعان بولاتىنبىز.