تەلەفونمەن ادەمى سۋرەت ءتۇسىرۋ جولدارى

نۇر-سۇلتان. قازاقپارات - تاڭنىڭ اتىسىنان كەشتىڭ باتىسىنا دەيىن قولىنان تەلەفون تۇسپەيتىن ادامداردىڭ قىلىعى قازىرگى ۋاقىتتا ەشكىمدى تاڭعالدىرمايدى.

بۇل قۇرىلعىلار شىققانىنا اسا كوپ ۋاقىت بولماسا دا، اتا- بابامىزدان قالعان مۇراداي كورەمىز. ونىڭ پايدالى تۇسىمەن قوسا، جامان جاعى دا جەتەرلىك. الايدا بۇگىن ءبىز سىزدەرگە نەگاتيۆ ەمەس، پوزيتيۆ سىيلاعاندى ءجون كوردىك. زيان تۇستارىن ءوزىڭىز دە ءبىلىپ العان بولارسىز.

تەلەفوننىڭ ەڭ ۇتىمدى تۇسىنىڭ ءبىرى ادامدار ءوزىنىڭ قاي جەردە ساياحاتتاپ، دەمالىپ، ۇيىقتاپ، سەرۋەندەپ نەمەسە تاماق ءىشىپ جاتقانىن كامەراعا ءتۇسىرىپ، جەلى ارقىلى دوستارىمەن بولىسۋگە تاماشا مۇمكىندىك سىيلاۋىندا.

ارينە، بارلىق ادام جوعارعى ساپادا نە كەرەمەت تۇسىرىلگەن سۋرەتتەر سالا بەرمەيدى. ويتكەنى، فوتوعا ءتۇسىرۋ ەرەجەلەرىن بىلمەيتىن جان ءۇشىن باستىسى - سۋرەتتە ءوز كەلبەتى قالاي كورىنۋى. كەيدە ءوز تەلەفونىڭىزدىڭ كامەراسى ويداعىداي فوتو تۇسىرمەي، كوڭىلىڭىزدى ءتۇسىرۋى مۇمكىن. ويتكەنى كاسىپقوي فوتواپپارات بولماعاسىن، ساپالى سۋرەتتىڭ اۋىلى الىستا قالادى.

ءبىراق، تەلەفونىڭىزدىڭ كامەراسى ءسىز ويلاعاننان دا زور مۇمكىندىككە يە ەكەنىن بىلەسىز بە؟ ول ءۇشىن قاراپايىم تۇرمىستا پايدالاناتىن زاتتار عانا قاجەت. ەندەشە جاقسىلاپ جايعاسىپ، پايدالى كەڭەستەرگە زەر سالىڭىز.

تۇنگى مەزگىلدە مۇلدەم وزگە كورىنىس تۇسىرۋگە بولادى. ول ءۇشىن كارتون قاعازى نەمەسە پلاستيككە ارنايى فيگۋرالار ويىپ، سول ماتەريالمەن كامەرا بەتىن جاباسىز. تۇنگى كوشەنىڭ جارىعى قاعازعا ءتۇسىپ، تەك ءسىز ويعان فيگۋرا عانا انىق كورىنەدى. مىسالى، مىنا سۋرەتتە، قاعازعا كىشكەنە ادامدار بەينەسى ويىپ سالىنعان، قاعازدىڭ ءبۇتىن جەرىنە تۇسكەن جارىق ارقىلى اينالاسىنا بۇلىڭعىر بەينە بەرىلەدى.

كەيدە كىشكەنتاي نارسەلەردى فوتوعا ءتۇسىرۋ قيىنعا سوعادى. سەبەبى ءسىزدىڭ تەلەفونىڭىزدىڭ كامەراسى مۇنداي سۋرەتتەرگە ارنالماعان. ءبىراق، ءسىز ەندى كىشكەنتاي زاتتاردىڭ ءوزىن ويداعىداي تۇسىرۋگە مۇمكىندىگىڭىز بار. ول ءۇشىن قىزداردىڭ شاش بەزەندىرگىشى مەن لينازنىڭ كىشكەنتاي بولىگى عانا قاجەت نەمەسە كەز كەلگەن لينزانى كامەرا تۇسىنا قويساڭىز بولادى.

كامەرانىڭ ساپاسىز سۋرەتتەرىن وڭدەپ شارشاعان جاندار ارنايى جاسالعان ءتۇرلى قوندىرعىلاردى پايدالانادى. تەلەفونىڭىزدىڭ كامەراسىنا كاپرون كولگوتكيدىڭ كىشكەنە قيىندىسىن قويىپ نە تەلەفوندى كاپرون ىشىنە سالىپ تۇسىرسەڭىز، كەرەمەت سۋرەتتىڭ كۋاگەرى بولاسىز.

كامەرانىڭ وبەكتيۆىنە ءبىر تامشى سۋ تامىزساڭىز، كەرەمەت ۇلكەن فوتو تۇسىرە الاسىز. سۋدى قولداناردا اباي بولىڭىز، كامەراڭىزعا زاقىم كەلتىرىپ الماس ءۇشىن مەديتسينالىق ينە (ۋكول) پايدالانعانىڭىز دۇرىس.

كۇندەلىكتى تۇتىنىپ جۇرگەن كۇننەن قورعايتىن كوزىلدىرىگىڭىز فوتو ءتۇسىرۋ كەزىندە دە پايداعا اسادى. جارىق كۇندە كەرەمەت جەرگە بارىپ سۋرەتكە تۇسۋگە قينالساڭىز كوزاينەك پايدالانىڭىز. ەگەر «بالىقتىڭ كوزى» دەپ اتالاتىن اسەرلى فوتوعا يە بولعىڭىز كەلسە، كوزى الىستى ناشار كورەتىندەرگە ارنلاعان كوزىلدىرىكتى پايدالانساڭىز بولادى.

ءتۇرلى ءۇستى پلاستيكالىق قابىقشالار دا سۋرەتتىڭ ءتۇسىن وزگەرتۋ ماقساتىندا كادەگە جارايدى. ءار ءتۇرلى ءتۇستىڭ قيىندىلارىن قالتاڭىزعا سالىپ جۇرسەڭىز، بولاشاقتا پايداسى كوپ بولماق.

ءبىر سوزبەن ايتقاندا، تەلەفوننىڭ كامەراسى تىم جارىق جەرلەردە ساپالى سۋرەت تۇسىرە المايدى. سەبەبى ونىڭ دايىندىعى قالىپتى بولىپ كەلەدى. ال، سىزگە مۇنداي فوتولار كەرەك ەمەس ەكەنىن ءوزىڭىز دە جاقسى بىلەسىز. سوندىقتان مۇمكىندىگىڭىز باردا باعىڭىزدى سىناپ كورىڭىز. تاجىريبە جۇزىندە پايدالانىپ، ويىڭىزدى پىكىر رەتىندە قالدىرساڭىز بولادى. ىسكە ءسات.

 

دەرەككوز: Reactor