ازامات سوعىسىنان قازاقتاي قانتوگىس كورگەن حالىق جوق - جۇماگۇل ابسەمەتوۆا

نۇر-سۇلتان. قازاقپارات - تاريح عىلىمدارىنىڭ كانديداتى جۇماگۇل ابسەمەتوۆا ⅩⅩ عاسىردىڭ باسىنداعى ازاماتتىق سوعىس جىلدارىندا قازاقتاي قانتوگىس كورگەن حالىق جوق ەكەنىن ايتتى، دەپ حابارلايدى قازاقپارات ءتىلشىسى.

بيىل - قازاق تاريحىندا تاعلىمدى تاعدىرىمەن ءىز قالدىرعان ت. جۇرگەنوۆ، ءى. جانسۇگىروۆ، ب. مايلين، س. قوجانوۆ، س. سەيفۋللين، ت. رىسقۇلوۆ، ت. شونا ۇلى سياقتى قازاق زيالىلارىنىڭ 125 جىلدىعى. ەلورداداعى ۇلتىق مۋزەي ساياسي قۋعىن- سۇرگىن قۇرباندارىن ەسكە الۋ كۇنىندە اتالمىش تۇلعالاردى ەسكە الۋ ءۇشىن «ۇلى دالانىڭ ۇلى تۇلعالارى» اتتى تاريحي-تانىمدىق دوڭگەلەك ۇستەل وتكىزدى.

ءبىر مينۋت ۇنسىزدىكپەن باستالعان شارا بارىسىندا عالىمدار جاس بۋىنعا ساياسي سۇرگىننىڭ قالاي تۋىنداعانىن تاريحي دەرەكتەرمەن ءتۇسىندىردى.

«1917 -جىلى قازاق دالاسىندا بولشەۆيكتەر بيلىككە كەلدى. العاشقى كەلگەن كۇننەن-اق قازاققا قارسى ساياسات ۇستاندى. ول ءۇشىن اۋەلى ۇلتتى باي-كەدەي دەپ ەكىگە ءبولدى. تۇتاس حالىقتى سيىردىڭ بۇيرەگىندەي ءبۇلدىرىپ، اكەنى بالاعا قارسى قويدى. ازامات سوعىسىنان قازاقتاي قانتوگىس كورگەن حالىق جوق سول جىلدارى. 1916 -جىلعا دەيىن ەتنيكالىق قۇرامىمىز قاتتى ءبۇلىنىپ قويعان بولاتىن. ورىس شارۋالارى مەن اسكەري بولىمدەر، «كازاچەستۆو» وكىلدەرى كوبەيگەن كەز. ەكونوميكالىق، رۋحاني، ساياسي، شارۋاشىلىق، كازاكتىق وتارلاۋ دەگەن بەس باعىتى بولدى. التى بىردەي ۇكىمەت ورناپ، ەلدى قوعاداي قىردى. سولاردان حالىقتى اراشالاۋ ءۇشىن الاشوردا قۇرىلدى»، - دەيدى عالىم.