كونە قىشقالا قالاشىعىن زەرتتەۋشىلەر جاڭا دەرەكتەرگە قول جەتكىزدى

قىزىلوردا. قازاقپارات - قىزىلوردا وبلىسى سىرداريا اۋدانى اۋماعىنا ورىن تەپكەن كونە قىشقالا شاھارىندا زەرتتەۋشىلەر جاڭا دەرەكتەرگە قول جەتكىزدى.

بۇل قالا الپامىس باتىردىڭ جارى - گۇلبارشىن ءومىر سۇرگەن بارشىنكەنت بولۋى ابدەن مۇمكىن، دەپ حابارلايدى قازاقپارات ءتىلشىسى.

قىشقالادا ارحەولوگيالىق زەرتتەۋ جۇمىستارى باستالعانىن بۇعان دەيىن حابارلاعان بولاتىنبىز. ارحەولوگيالىق قازبا جۇمىستارى  قىزىلوردا وبلىسىنىڭ تاريحي جانە مادەني مۇرالاردى قورعاۋ جانە پايدالانۋ جونىندەگى عىلىمي- ادىستەمەلىك كەڭەستىڭ شەشىمىمەن قولعا الىنىپ وتىر. قازبا جۇمىستارىن ەلىمىزگە بەلگىلى تاريحشى-ارحەولوگ ماديار ەلەۋوۆ باسشىلىق ەتەتىن «ارحەولوگ» حالىقارالىق عىلىمي- زەرتتەۋ ورتالىعى جۇرگىزۋدە. جوبا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى جانە «ۇلى دالانىڭ جەتى قىرى» ماقالاسى اياسىندا جۇزەگە اسىرىلىپ وتىر.

 

بۇگىنگى كۇندەرى قىشقالا اۋماعىنان كوپتەگەن قۇندى جادىگەرلەر ارشىلىپ الىندى. ولار كونە مەكەننىڭ بارشىنكەنت بولۋى مۇمكىن دەگەن جورامالىن ناقتىلاي تۇسەدى. ارحەولوگتاردىڭ ايتۋىنشا، اتالمىش قالاشىقتى زەرتتەۋ سىر بويىنداعى ورتا عاسىرلىق قالالاردى زەرتتەۋ مەن تاريحىن انىقتاۋدا ءوز سەپتىگىن تيگىزەتىن بولادى. قىشقالانىڭ شىن اتاۋى ءالى كۇنگە دەيىن بەلگىسىز. ەل اراسىندا ونى بارشىنكەنت دەيتىن بولجامدار ايتىلادى.

 

«قىشقالا وتكەن عاسىردىڭ 90- جىلدارىنا دەيىن تاريحشىلار نازارىنان تىس قالىپ كەلدى. مۇندا عىلىمي نەگىزدە زەرتتەۋ جۇرگىزىلە قويعان جوق. تەك اۋەسقويلىق دەڭگەيدە قازبا شارالارى جاسالدى. سوڭعى جىلداردا قىشقالانى زەرتتەۋدە ناتيجەلى جۇمىستار قولعا الىنىپ وتىر»، - دەدى قىزىلوردا وبلىستىق تاريحي جانە مادەني ەسكەرتكىشتەردى قورعاۋ مەكەمەسىنىڭ ءبولىم باسشىسى عالىمجان سادىقوۆ.

بىلتىر بۇل قالاشىقتى زەرتتەۋ بارىسىندا حان شاتىرىنا ۇقساس عيمارات ورنى انىقتالعان ەدى.

بۇل قاستەرلى مەكەن ءىرى ساۋدا جانە قولونەر ورتالىعى بولۋى مۇمكىن. سەبەبى، اتالمىش مەكەن جىبەك جولى بويىندا ورنالاسقاندىقتان سونداي دەڭگەيگە كوتەرىلگەن دەۋگە نەگىز بار. تابىلعان قىش ىدىستاردىڭ سىنىقتارى سونداي جورامال جاساۋعا نەگىزدەيدى. وسىنداي قايناعان تىرشىلىك اۋانى X- Ⅺ عاسىرلاردا باستالعان. ول ⅩⅢ عاسىرداعى التىن وردانىڭ ساۋدا بايلانىستارى وركەن جايعانعا دەيىن داۋىرلەپ تۇرعان.