ايگىلى «مەنىڭ اتىم قوجا» فيلمى لوندوندا اعىلشىن تىلىندە كورسەتىلەدى
بۇل تۋرالى ەۋرازيالىق كينوفەستيۆالىنىڭ ديرەكتورى مايرا قارساقبايەۆا «ەگەمەن قازاقستان» گازەتىنە بەرگەن سۇحباتىندا ءمالىم ەتكەن. جوبانى لوندوندىق «Romford film festival» كومپانياسى قارجىلاندىردى.
«بۇل ۇزاق جىلعى كەلىسسوزدىڭ ناتيجەسى. ورتالىق ازيا ەلدەرى تاريحىندا قازاق كينوسى تۇڭعىش رەت اعىلشىن تىلىنە ءتارجىمالاندى. دۋبلياجعا امەريكالىق كينو-تەاتر ۇيىرمەلەرىنىڭ مۇشەلەرى قاتىستى. ولاردى تابۋ نەمەسە كەلىستىرۋ بىزگە وڭاي بولعان جوق»، - دەگەن ەكەن مايرا قارساقبايەۆا جۋرناليسپەن اڭگىمەسىندە.
سونىمەن قاتار، «Romford film festival» شىمىلدىعى قازاقتىڭ كلاسسيكالىق كينوسىمەن اشىلادى. كينوفەستيۆالدە قازاقستاندىق كينورەجيسسەر ءازيز زايىروۆتىڭ «قىز بەن تەڭىز» كينوسىنىڭ تانىستىرىلىمى بولادى.
«بۇل «مەنىڭ اتىم قوجانىڭ» العاشقى شەتەلگە شىعۋى ەمەس. 2018 -جىلدىڭ قازان ايىندا بەردىبەك سوقپاقبايەۆتىڭ «مەنىڭ اتىم قوجا» كىتابى تۇڭعىش رەت تۇرىك تىلىنە اۋدارىلىپ، انادولى جەرىندەگى وقىرماندارىمەن قاۋىشقان بولاتىن. دۇنيەجۇزىنىڭ 67 تىلىندە جارىق كورگەن شىعارمانى تۇرىك تىلىندە سويلەتكەن اۋدارماشى ءجاميلا كىنادجى»، - دەلىنگەن اقپاراتتا.