س ق و-دا «سولتۇستىك سوياسى» اتتى جاڭا باعدارلاما جۇزەگە اسا باستادى

پەتروپاۆل. قازاقپارات - سولتۇستىك قازاقستان وبلىسىندا «سولتۇستىك سوياسى» اتتى باعدارلاما قولعا الىندى.

جاڭا جوبا ءداندى داقىل وسىرۋشىلەردى قولداۋعا نەگىزدەلگەن، دەپ حابارلايدى قازاقپارات ءتىلشىسى.

س ق و ىشكى ساياسات باسقارماسىنىڭ مالىمەتىنشە، ق ر اۋىل شارۋاشىلىعى ءبىرىنشى ۆيتسە- ءمينيسترى ايداربەك ساپاروۆ پەن وبلىس اكىمىنىڭ ءبىرىنشى ورىنباسارى مارات تاسماعانبەتوۆ «سولتۇستىك سوياسى» باعدارلاماسىنىڭ جوسپارىنا قول قويدى.

جوبا بىرەر كۇن بۇرىن اۋىل شارۋاشىلىعى مينيسترلىگىندە پرەمەر-مينيستر اسقار ماميننىڭ توراعالىعىمەن وتكەن كەڭەستە تانىستىرىلدى. كەڭەستىڭ ناتيجەسى بويىنشا، سولتۇستىك وڭىرلەرگە سويا القاپتارىن ۇلعايتۋ تاپسىرىلدى.

باعدارلاما سويا ءوسىرۋدى قولعا العان كاسىپكەرلەردى مەملەكەتتىك، قارجىلاي قولداۋعا باعىتتالعان. 5 -جىلدىڭ ىشىندە داقىل القابىن 1,5 ميلليون گەكتارعا، جالپى ءونىمدى 3 ميلليون تونناعا جەتكىزۋ جوسپارلانعان. ەكسپورتتى ۇلعايتىپ، جاڭا جۇمىس ورىندارىن اشۋ كوزدەلىپ وتىر.

«بۇل باعدارلامانى جۇزەگە اسىرۋ ءۇشىن س ق و كەزدەيسوق تاڭدالعان جوق. ءوڭىر وسىمدىك شارۋاشىلىعىن ءارتاراپتاندىرۋ بويىنشا كوشباسشى. قازىر 1 ميلليون گەكتار مايلى داقىلدار ەگىلەدى. جەرگىلىكتى اۋىلشارۋاشىلىعى تاۋارلارىن وندىرۋشىلەر ءىس جۇزىندە استىقتىڭ قالدىعى ەكونوميكالىق تۇرعىدا ءتيىمدى ەكەنىن كوردى. ءونىمدى وتكىزەتىن جەر دە بارشىلىق، باعاسى دا قولايلى. سونداي-اق، وبلىستا جەر بار، شارۋالار دا قىزىعۋشىلىق تانىتىپ وتىر»، - دەدى قۇجاتقا قول قويۋ بارىسىندا ق ر اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ.

مامانداردىڭ ايتۋىنشا، بيىل وڭىردە 14 مىڭ گەكتار جەرگە ەرتە پىسەتىن جانە ونىمدىلىگى جوعارى سويا تۇقىمى ەگىلمەك. وبلىستىڭ اۋا رايىنا كەلەتىن ەليتالىق جانە سۋپەرەليتالىق تۇقىمدار اۆستريادان جەتكىزىلدى. ال شىققان ءونىم كەلەسى جىلى تۇقىم رەتىندە قولدانىلادى.