قازاقستاندا ىشكى تۋريزم قارقىن الىپ كەلەدى
وتكەن جىلى ەلىمىزدە ىشكى تۋريزم سالاسىندا قىزمەتتى پايدالانۋشىلار سانى 5,9 ملن ادامنان اسىپ كەتكەن. ءبىر جىل بۇرىن بۇل كورسەتكىش 5,6 ميلليون ادام ەدى. ولاردىڭ 4,9 ميلليون ادامى قونىپ دەمالعان.
ساناتوريالىق-كۋرورتتىق مەكەمەلەردىڭ قىزمەتىن پايدالانعان تۋريستەردىڭ سانى 296,9 مىڭ ادامعا جەتتى (ءبىر جىل بۇرىن 285,5 مىڭ ادام ەدى). ەرەكشە قورعالاتىن تابيعي ورىندارعا بارعان تۋريستەردىڭ سانى - 871,9 مىڭ ادام ء(بىر جىل بۇرىن 889,6 مىڭ ادام بولعان).
قازاقستاندا بولاشاقتا بالالار مەن جاسوسپىرىمدەر تۋريزمىن دامىتۋعا ءمان بەرىلگەلى وتىر. بۇعان دەيىن حابارلانعانداي، 2020 -جىلدان باستاپ ايماقتاردى ارالايتىن «بالالارعا ارنالعان تەگىن پويىز» ىسكە قوسىلماق.
سونىمەن قاتار، «1+2» سىزباسى بويىنشا kids go free قاعيداتىمەن بالالارعا ارنالعان تەگىن اۆياباعدار ورناتۋ كوزدەلگەن. ول تۋرالى مادەنيەت جانە سپورت ءمينيسترى ارىستانبەك مۇحامەدي ۇلى بۇعان دەيىن ايتىپ بەرگەن بولاتىن.
ايتا كەتسەك، قازاقستاندىقتاردى، سونداي-اق شەتەلدىكتەردى قابىلداپ، دەمالدىرۋعا ءازىر ورنالاستىرۋ ورىنداردىڭ سانى وتكەن جىلى 2,99 مىڭنان 3,32 مىڭعا جەتكەن ەدى. ولاردىڭ كوبى باستى تۋريستىك ايماق سانالاتىن شىعىس قازاقستاندا (537)، الماتى وبلىسىندا (519) جانە اقمولا (287) وبلىسىندا شوعىرلانعان.
كۋرورتتىق اۋماقتاردا ورنالاستىرۋ ورىندارىنىڭ سانى 2018 -جىلدىڭ قورىتىندىسى بويىنشا 10,4 پايىزعا، ياعني 900 گە وسكەن.
قازاقستاندا ماركەتينگتىك كوممۋنيكاتسيانىڭ تيىمدىلىگىن كوتەرۋ ءۇشىن نەگىزگى تۋريستىك اۋماقتاردىڭ ايقىندالعانى بەلگىلى. الداعى ۋاقىتتا سول اۋماقتارعا بارىنشا ماڭىز بەرىلەدى.
اتاپ ايتقاندا، ەل بيلىگى الماتىنىڭ تاۋ كەشەندەرىنە، نۇر-سۇلتانعا، بۋرابايعا، تۇركىستان وبلىسىنا، الاكولگە، ماڭعىستاۋ مەن باياناۋىلعا، بالقاش پەن شالقار-يمانتاۋ كۋرورتتىق ورىندارىنا كوپتەپ تۋريستەردى تارتۋ امالدارىن قاراستىرماق.
ال ءبىر جىلدىڭ ىشىندە سىرتقى تۋريزم دەڭگەيى 3,8 پايىزعا، ىشكى تۋريزم دەڭگەيى 5,8 پايىزعا ارتقان.