يراك سوتى ءۇش فرانسيالىقتى ءولىم جازاسىنا كەستى

 نۇر-سۇلتان. قازاقپارات - يراك سوتى تىيىم سالىنعان «يسلام مەملەكەتى» دەپ اتالاتىن تەرروريستىك توبىنىڭ قىزمەتىنە ارالاستى دەگەن ايىپپەن فرانسيانىڭ ءۇش ازاماتىن ءولىم جازاسىنا كەستى.

سوتتالعاندار - كيەۆين گونو، لەونارد لوپەس جانە ساليم ماچۋ 30 كۇن ىشىندە سوت ۇكىمىن اپەللياتسياعا بەرە الادى. بۇل تۋرالى ۇلى بريتانيالىق BBC ارناسى حابارلادى.

سايتتىڭ جازۋىنشا، سوتتالعان ءۇش ازاماتپەن بىرگە تاعى توعىز فرانسۋزدى ا ق ش قولدايتىن كۇشتەر سيريا اۋماعىندا ۇستاعان. بيىل اقپاندا ولار سوتقا تارتۋ ءۇشىن يرانعا جىبەرىلگەن.

بۇل ءۇش ازامات - ءولىم جازاسىنا كەسىلگەن العاشقى فرانسيالىقتار.

پاريج باعداد سوتىنىڭ بۇل ۇكىمىنە قاتىستى ازىرگە پىكىر بىلدىرمەدى. ءبىراق بيىل اقپاندا فرانسۋزداردىڭ سوتقا تارتىلىپ جاتقانى تۋرالى حابارعا فرانسيا پرەزيدەنتى ەممانۋەل ماكرون «بۇل - يراكتىڭ ىشكى ءىسى» دەپ، پىكىر بىلدىرۋدەن باس تارتقان.

Human Rights Watch باستاعان بىرنەشە حالىقارالىق قۇقىق قورعاۋ ۇيىمى «جالا مەن ازاپتاۋ ارقىلى ازاماتتاردى سوتتايدى» دەپ يراك سوتىن سىناعان.

Amnesty International قۇقىق قورعاۋ ۇيىمىنىڭ بيىل ساۋىردە جاريالانعان ەسەبى بويىنشا، يراك ازاماتتاردى ءولىم جازاسىنا كەسۋ بويىنشا الەمدە العاشقى بەستىكتە تۇر. يراك سوتتارىنىڭ ازاماتتاردى ولىمگە كەسۋ تۋرالى ۇكىمدەرى 2017-2018 -جىلدارى ءتورت ەسە ءوسىپ، كەم دەگەندە 271 ادامعا وسىنداي جازا تايىندالعان. ۇيىم «بىلتىر مۇنىڭ 52 سى عانا ىسكە استى» دەپ جازادى.

 «ازاتتىق»