دارىدەن ۋلانىپ نۇر-سۇلتانعا اكەلىنگەن اقمولالىق بالالار تىلگە كەلە باستادى
بۇل تۋرالى اقمولا وبلىسىنىڭ دەنساۋلىق ساقتاۋ باسقارماسىنىڭ باسپا ءسوز قىزمەتىنەن حابارلادى، دەپ حابارلايدى قازاقپارات ءتىلشىسى.
«جەكسەنبى كۇنى، مامىردىڭ 26 سىندا نۇر-سۇلتان قالالىق بالالار اۋرۋحاناسى باس دارىگەرىنىڭ ەمدەۋ جۇمىستارى جونىندەگى ورىنباسارىنىڭ مالىمەتى بويىنشا مامىردىڭ 25 ىندە ساناۆياتسيامەن جەتكىزىلگەن 2006 جانە 2005 -جىلدارى تۋعان بالالاردىڭ جاعدايى بۇگىن تاڭەرتەڭ جاقساردى. بالالار ەستەرىن جيىپ، تىلگە كەلدى. ال، 2003 -جىلعى ءۇشىنشى جاس ءوسپىرىم «ەپيلەپسيا» سىرقاتىمەن ەسەپتە تۇرعان بالا انەستەزيولوگيا بولىمىندە جاتىر»، دەپ اتاپ ءوتتى اقمولا وبلىسىنىڭ دەنساۋلىق ساقتاۋ باسقارماسىنداعىلار.
اتالعان بالالاردىڭ بارلىعى نۇر-سۇلتان قالاسىنىڭ №2 -بالالار اۋرۋحاناسىندا توكسيكولوگ، رەانيماتولوگ دارىگەرلەردىڭ باقىلاۋىندا.
ۆەدومستۆونىڭ دەرەگى بويىنشا، 3 جاستاعى ءتورتىنشى بالا 5 تابلەتكا عانا ىشكەندىكتەن ەسىن بىلەدى، ەرەيمەنتاۋ اۋداندىق اۋرۋحاناسىنىڭ بالالار بولىمشەسىندە ەم قابىلداپ جاتىر.
ايتا كەتۋ كەرەك، وسىعان دەيىن حابارلاعانىمىزداي، 2019 -جىلدىڭ 25 -مامىرىندا اقمولا وبلىسىنىڭ ەرەيمەنتاۋ اۋدانىندا 13-15 جاس ارالىعىنداعى ءتورت جاس ءوسپىرىم دارىدەن ۋلانىپ قالعان بولاتىن. جاعدايدى زەردەلەۋ بارىسىندا ءار بالانىڭ بۇلشىق ەتتەرىن ءوسىرۋ ءۇشىن «فينلەپسين» ءدارىسىن ىشكەنى انىقتالدى.