قاراعاندى وبلىسى اكىمىنىڭ ورىنباسارى پىشاق جاراقاتىن الدى

قاراعاندى. قازاقپارات - الەۋمەتتىك مەسسەندجەرلەردىڭ بىرىندە قاراعاندى وبلىسى اكىمىنىڭ ورىنباسارى الماس ايداروۆ پىشاق جاراقاتىن العانى تۋرالى جاريالاندى، دەپ حابارلايدى قازاقپارات ءتىلشىسى.

«26 -مامىردا ساعات 05:30-دا قاراعاندى قالاسىنىڭ ورتالىق پ ب-نە جەدەل جاردەم قىزمەتىنەن پىشاق جاراقاتىن العانى تۋرالى حابارلاما كەلىپ ءتۇستى. انىقتالعانداي، 1983 -جىلعى (قازاننىڭ 25) الماس ايداروۆ (وبلىس اكىمىنىڭ ورىنباسارى) ابايسىزدا پىشاقتان جاراقات العانى ايتىلعان (وڭ جاق كەۋدە تۇسىنان تەرەڭ ەمەس جارالانعان). جاراقات تانۋشى ەشكىمنىڭ ۇستىنەن ارىز جازبايتىنىن مالىمدەگەن.

ا. ايداروۆتىڭ ءتۇسىندىرۋى بويىنشا تورت كەسىپ جاتقاندا، ابايسىزدان قولىنداعى پىشاعى تايىپ كەتىپ، جاراقاتتانىپ قالعان. اتالمىش دەرەك قاراعاندى قالالىق پوليتسيا باسقارماسىندا سوتقا دەيىنگى تەرگەۋدىڭ ءبىرىڭعاي تىزىلىمىنە الىندى»، - دەلىنگەن اقپاراتتا.

بۇل دەرەكتى قاراعاندى وبلىسى اكىمىنىڭ باسپا ءسوز قىزمەتىندە راستادى. «وبلىس اكىمى ورىنباسارىنىڭ جاعدايى جاقسى»، دەپ سەندىردى باسپا ءسوز قىزمەتىندەگىلەر.

«ا. ايداروۆتىڭ جاعدايى تۋرالى الاڭداۋشىلىق بىلدىرگەندەرىڭىز ءۇشىن راحمەت. ءبىراق ۋايىمداۋعا ەش سەبەپ جوق. اكىمنىڭ ورىنباسارى ءوزىن جاقسى سەزىنەدى. ەرتەڭ ادەتتەگى رەجىمدە جۇمىسقا شىعادى»، - دەدى وبلىس اكىمى باسپا ءسوز قىزمەتىنىڭ جەتەكشىسى مارينا شاپوۆالوۆا.

الماس ايداروۆتىڭ Facebook-تەگى پاراقشاسىندا، امان-ەسەن ەكەنىن، دەنساۋلىعىنا قاتىستى الاڭداۋشىلىق بىلدىرگەن جاندارعا العىسىن ايتىپ جازبا جاريالادى.