قاتتى داۋىل قۇم استىندا تاسقا اينالعان ورماندى اشتى

نۇر- سۇلتان. قازاقپارات - 4,5 مىڭ جىل بويى قۇم مەن سۋدىڭ استىندا جاتقان تاريحقا دەيىنگى ورمان اياق استىنان ۋەلستە بولعان داۋىلدىڭ ناتيجەسىندە اشىلدى، دەپ حابارلايدى bbc.com.

قاتتى جەلدىڭ ەكپىنىمەن تەڭىز تارتىلىپ، اعاشتار جاتقان شىمتەزەك اشىلدى. تاس بولىپ قاتىپ قالعان سان جۇزدەگەن اعاش دىڭدەرىن كەرەديگيون گرافتىعىندا بورت پەن ينيسلاس اۋىلدارىنىڭ اراسىنان كورۋگە بولادى.

XVII عاسىردا توپان سۋ باسىپ قالعان وركەنيەت جايلى «سۋعا باتقان جۇزدىك» دەپ اتالاتىن اڭىز تاراعان.

بۇل جەر بۇرىنعى ۋاقىتتا سۋ تاسقىنىنان بوگەتتەر مەن شليۋزداردىڭ كومەگىمەن قورعالىپ، شۇرايلى جەرى مەن حالقى بار اۋماق بولعان دەپ ەسەپتەلەدى. اڭىزدا بۇل جەردىڭ قاتتى داۋىل بولعان كەزدە بىرنەشە رەت سۋ استىندا قالعانى ايتىلادى.

ءبىزدىڭ زامانىمىزدىڭ VI عاسىرىندا 16 جەرگىلىكتى اۋىل سۋعا باتىپ، كوپتەگەن ادامدار قازا تاپقان.