قاراعاندىداعى قايعىلى وقيعا: ۇرمەلى باتۋتتى دۇرىس ورناتپاعان ازامات قاماۋعا الىندى
ەسكە سالا كەتەيىك، 25 -مامىردا قاراعاندى قالاسىنىڭ ورتالىق دەمالىس ساياباعىندا قاتتى جەلدىڭ سالدارىنان ۇرمەلى باتۋت اۋدارىلىپ كەتكەن بولاتىن.
وقيعا سالدارىنان 11 جاستاعى بالا قازا تاۋىپ، تاعى دا 2 بالا ءتۇرلى جاراقاتتارمەن ەمحاناعا جەتكىزىلدى.
اتالعان فاكتىگە قاتىستى ق ر ق ك-نىڭ 306 -بابى 3 -تارماعىنا سايكەس «ادام ولىمىنە الىپ كەلگەن قاۋىپسىزدىك تالاپتارىنا جاۋاپ بەرمەيتىن قىزمەت كورسەتۋ» بويىنشا قىلمىستىق ءىس قوزعالعان.
تەرگەۋ بارىسى قاراعاندى وبلىسى پوليتسيا دەپارتامەنتىنىڭ جانە پروكۋراتۋراسى باسشىلىعىنىڭ باقىلاۋىندا.
سونداي-اق بۇگىن قاراعاندى قالاسىنىڭ اكىمى نۇرلان اۋباكىروۆ جەدەل كەڭەس وتكىزدى، وندا ۋاكىلەتتى ورگاندارعا ۇرلەمەلى اتتراكتسيونداردىڭ قىزمەتىن توقتاتۋ، سونداي-اق ورتالىق ساياباقتىڭ بارلىق اتتراكسيوندارىنىڭ قاۋىپسىزدىككە سايكەستىگىن تەكسەرۋدى ۇيىمداستىرۋ تۋرالى تاپسىرمالار بەرىلدى.
«قۇرمەتتى قاراعاندى قالاسىنىڭ تۇرعىندارى، باتۋتتاردى ورناتۋ فاكتىلەرىن بايقاعان كەزدە پوليتسياعا حابارلاۋدى وتىنەمىز. سونىمەن قاتار، بارلىق اتا-انالاردى ويىن-ساۋىق جانە دەمالىس ورىندارىنا بارۋ كەزىندە قاۋىپسىزدىك تەحنيكاسىن ساقتاۋعا شاقىرامىز»، - دەپ حابارلادى قاراعاندى قالاسى اكىمىنىڭ باسپا ءسوز قىزمەتى.