ەلباسىنىڭ قۇرمەتتى ءتوراعا اتانۋىنا وراي تۇرىك باسىلىمدارى نە جازىپ جاتىر
بۇل تۋرالى تۇرىكتىڭ تانىمال ب ا ق وكىلدەرى جازدى، دەپ حابارلايدى قازاقپارات.
ەسكە سالا كەتەيىك، كەشە ەلباسى نۇرسۇلتان نازاربايەۆ تۇركى كەڭەسىنىڭ قۇرمەتتى ءتوراعاسى اتانعان بولاتىن. تۇركيا رەسپۋبليكاسىنىڭ پرەزيدەنتى رەجەپ تايپ ەردوعاننىڭ ۇسىنۋىمەن جانە تۇركى كەڭەسىنە مۇشە ەلدەردىڭ ماقۇلداۋىمەن قازاقستاننىڭ تۇڭعىش پرەزيدەنتى نۇرسۇلتان نازاربايەۆقا تۇركى كەڭەسىنىڭ ءومىر بويعى قۇرمەتتى ءتوراعاسى مارتەبەسى بەرىلدى.
بۇل تۋرالى تۇركيا رەسپۋبليكاسىنىڭ سىرتقى ىستەر ءمينيسترى ميەۆليۋت چاۆۋشوگلۋ 24 -مامىر كۇنگى ەلباسىمەن كەزدەسۋىندە مالىمدەدى. م. چاۆۋشوگلۋ اقساقال، ەلباسى نۇرسۇلتان نازاربايەۆتىڭ قازاق حالقىنىڭ يگىلىگى جولىنداعى كورەگەندىگىن ءارقاشان جوعارى باعالاعانىن ايتا وتىرىپ، «تۇركيا مەن قازاقستان اراسىنداعى بايلانىستاردى دامىتۋداعى كوشباسشىلىعى، ەڭبەگى مەن كورەگەندىگى ءۇشىن وزىنە تاعى دا ۇلكەن العىس بىلدىرەمىز» دەدى.
انادولۋ اگەنتتىگىنىڭ جازۋىنشا، نازاربايەۆتىڭ كوشباسشىلىعىمەن قازاقستان الەۋمەتتىك، مادەني جانە ەكونوميكالىق تۇرعىدان دامىدى، بەيبىتشىلىك جانە كەلىسىم پرينتسيپتەرىنە نەگىزدەلە وتىرىپ، كورشىلەس ەلدەرمەن بايلانىستارىن نىعايتتى، سونداي-اق، حالىقارالىق ارەناداعى سالماعىن ارتتىرا ءتۇستى. يادرولىق قارۋدان باس تارتۋ، ا و س ش ك- ن قۇرۋ، بۇۇ قاۋىپسىزدىك كەڭەسى مۇشەلىگى سياقتى باستامالارىمەن كوزگە تۇسكەن قازاقستان بۇگىندە ەۋرازيا كەڭىستىگىنىڭ ماڭىزدى ويىنشىسىنا جانە حالىقارالىق قاۋىمداستىقتىڭ بەدەلى جوعارى مۇشەسىنە اينالعان.
جاڭالىقتى تۇركيانىڭ ءبىرقاتار گازەتتەرى مەن اقپاراتتىق پورتالدارى جاريالادى. اتاپ ايتقاندا، تۇرىك باسىلىمدارى ن. نازاربايەۆتىڭ قازاقستاننىڭ عانا ەمەس، تۇركى الەمىنىڭ ليدەرى ەكەنىن، ونىڭ كۇللى تۇركى جۇرتىن بىرلەستىرۋ جولىندا ماڭىزدى قادامدار جاساعانىن جازۋدا. ولار تۇركى الەمىنىڭ اقساقالى اتانىپ كەتكەن ن. نازاربايەۆتىڭ تۇركى كەڭەسىنىڭ دەم بەرۋشىسى جانە 1992 -جىلدان بەرى وتكىزىلگەن 15 تۇركى مەملەكەت باسشىلارى ءسامميتىنىڭ بارلىعىنا مۇلتىكسىز قاتىسقان جالعىز كوشباسشى ەكەندىگىنە نازار اۋداردى. نازاربايەۆتىڭ «ۇلى دالانىڭ جەتى قىرى» باعدارلامالىق ماقالاسىن جاريالاۋى مەن قازاق ءتىلىن لاتىن الىپبيىنە كوشىرۋ تۋرالى شەشىمىنىڭ تۇركى الەمىن ودان سايىن جاقىنداستىرۋعا باعىتتالعان ستراتەگيالىق قادامدار ەكەندىگىنىڭ استى سىزىلۋدا.
ءوز كەزەگىندە، تۇركيانىڭ بەلگىلى ساراپشىلارى دا جاڭالىققا قاتىستى پىكىرلەرىن بىلدىرۋدە. ماسەلەن، ساياساتتانۋشى، پروفەسسور ك. زورلۋ مەن ەۋرازيا جازۋشىلار وداعىنىڭ باسشىسى يا. ومەروگلۋ نۇرسۇلتان نازاربايەۆقا قۇرمەتتى ءتوراعا اتاعىنىڭ بەرىلۋىنە بايلانىستى قۋانىشتارىن ءبولىسىپ، تۇركى كەڭەسى مەن تۇركى الەمىنىڭ وسى قادامنان كەيىن كۇشەيە تۇسكەنىنە جانە جاۋاپكەرشىلىگىنىڭ ارتا تۇسكەنىنە نازار اۋداردى.