ءۇي جانۋارلارىن پويىزدا قالاي الىپ ءجۇرۋ كەرەك

نۇر-سۇلتان. قازاقپارات - قازاقستاندا پويىز كۋپەلەرىندە جولاۋشىلارعا يت، مىسىق، قۇس سياقتى جانۋارلاردى الىپ جۇرۋگە رۇقسات بەرىلگەن، دەپ حابارلايدى قازاقپارات «جولاۋشىلار تاسىمالى» ا ق باسپا ءسوز قىزمەتىنە سىلتەمە جاساپ.

 جازعا ماۋسىمعا وراي «جولاۋشىلار تاسىمالى» ا ق-ى تەمىرجولدا ءۇي جانۋارلارىن تاسىمالداۋ شارتتارى تۋرالى حابارلادى. جولاۋشىلارعا كۋپەدە يت، مىسىق، قۇس سياقتى جانۋاردى الىپ جۇرۋگە رۇقسات بەرىلگەن. الايدا، بۇنداي تاسىمالدىڭ وزىندىك ەرەكشەلىكتەرى بار.

«ق ر ينۆەستيتسيا جانە دامۋ ءمينيستىرنىڭ «جولاۋشىلار جانە جۇك تاسىمالى» ەرەجەسىنىڭ №545 بۇيرىعىنا سايكەس ءۇي جانۋارلارى تاسىمالدانعان كەزدە مىندەتتى تۇردە كەلەسى باپتاردى ەسكەرگەن ءجون: تاسىمالداناتىن جانۋارلاردىڭ ۆەتەريناريالىق قۇجاتتارى بولۋى كەرەك؛ جانۋار يەسى ارنايى ءبىر كۋپەنى تولىقتاي ساتىپ الۋى قاجەت (باسقا جولاۋشىلاردىڭ اللەرگياسىن الدىن الۋ ءۇشىن)؛ جانۋارلار ارنايى جاشىكتەر مەن قوراپتاردا تاسىمالدانۋى كەرەك»، دەلىنگەن حابارلامادا.

قالا ماڭىنا قاتىنايتىن پويىزدا ءۇي جانۋارلارى يەلەرىمەن بىرگە ارنايى جاشىكتەردە تاسىمالدانادى. ءىرى تۇقىمدى يتتەر ۆاگون تامبۋرىندا تاسىمالدانادى. ولارعا مىندەتتى تۇردە تۇمىلدىرىق كيگىزىلىپ، قارعى باۋلارى بەرىك بايلانۋى ءتيىس. سول ۆاگوندا وتىرعان ءيتتىڭ يەسى ءار ۋاقىتتا ونى قاداعالۋى ءتيىس.

«سونداي-اق، زاعيپ جانداردىڭ جەتەكشىسى بولاتىن يتتەر تەگىن تاسىمالدانادى. ولارعا دا تۇمىلدىرىق كيگىزىلىپ، قارعى باۋى قىسقا بولۋى شارت. باسقا جانۋارلار جۇك ۆاگوندارىندا تاسىمالدانادى»، دەلىنگەن حابارلامادا.