ەرجان ماكسيم «گولوس. دەتي» بايقاۋىنىڭ جەڭىمپازى اتاندى

نۇر-سۇلتان. قازاقپارات - رەسەيدىڭ ءبىرىنشى ارناسىنىڭ «گولوس. دەتي» كونكۋرسىنىڭ ارنايى شىعارىلىمى تىكەلەي ەفيردەن كورسەتىلدى، دەپ حابارلايدى قازاقپارات ءتىلشىسى.

بۇل جولى ميكەللا ابراموۆادان باسقا فينالعا جولداما العانداردىڭ بارلىعى ونەر كورسەتتى.

اۋەلى پەلاگەيا، سودان كەيىن سۆەتلانا لوبودانىڭ كومانداسىندا بولعاندار ساحناعا شىقتى.

ەڭ سوڭىنان ۆالەري مەلادزەنىڭ شاكىرتتەرىنە كەزەك كەلدى.

ورالدىق ەرجان ماكسيم «اداجيو» ءانىن ورىنداپ، كورەرمەندەردىڭ قوشەمەتىنە بولەندى.

شوۋدى قورىتىندىلاعان ءبىرىنشى ارنانىڭ باس ديرەكتورى كونستانتين ەرنست «گولوس. دەتي» بايقاۋىنىڭ جەڭىمپازى رەتىندە ءبىرىنشى بولىپ ەرجان ماكسيمدى اتادى. سودان كەيىن نينو چەسنەر، ۆالەري كۋزاكوۆ، رەناتا تايروۆا، روبەرت باگراتيان، اناستاسيا سيساۋري، ميحايل گريگوريان، ماريام ابدەلكادەر جانە ارنايى شىعارىلىمعا قاتىسپاسا دا، ميكەللا ابراموۆا جەڭىمپاز بولىپ تانىلدى. ولاردىڭ بارىنە دەمەۋشى تاراپىنان 1 ميلليون رۋبلدىڭ سەرتيفيكاتى تابىس ەتىلدى.

ەسكە سالا كەتەيىك، بۇدان بۇرىن ەرجان ماكسيمنىڭ سۋپەرفينالدا ونەر كورسەتىپ، ەكىنشى ورىن العانىن جازعان بولاتىنبىز.

الايدا كەيىن داۋىس بەرۋ قورىتىندىسىنا بايلانىستى داۋ تۋىنداپ، رەسەيدىڭ ءبىرىنشى ارناسى التىنشى ماۋسىم ناتيجەسىن قايتا قاراپ، جوققا شىعارعان ەدى. ءسويتىپ ارنايى شىعارىلىم كورسەتۋ جونىندە شەشىم قابىلداندى.