الەمدىك ونەر جۇلدىزدارى نۇر- سۇلتاندا تەگىن كونسەرت بەرەدى
ماۋسىم ايىنىڭ 3-7 ارالىعىندا وتەتىن «استانا كەشتەرى» ونەر فەستيۆالى - مۋزىكالىق ونەر كەڭىستىگىندەگى ايتۋلى وقيعالاردىڭ ءبىرى. بيىل حالىقارالىق فەستيۆال اياسىندا وتاندىق جانە الەمدىك ونەر جۇلدىزدارى ءبىر ساحنادا ونەر كورسەتىپ، 5 قايىرىمدىلىق كونسەرتىن وتكىزەدى.
«استانا كەشتەرى» فەستيۆالىنىڭ ۇيىمداستىرۋ كوميتەتىنىڭ ءتورايىمى داريعا نازاربايەۆانىڭ باستاماسىمەن اتالمىش ونەر مەرەكەسىن جىل سايىن وتكىزۋ 2012 -جىلدان بەرى داستۇرگە اينالعان. فەستيۆالدىڭ باستى ماقساتى - حالىقتىڭ ءتۇرلى الەۋمەتتىك توپتارىنا الەمدىك ونەردىڭ جاۋھارلارىن تاماشالاۋعا مۇمكىندىك بەرۋ. سوندىقتان قايىرىمدىلىق ماقساتتا وتكىزىلەتىن بۇل جوبانىڭ كونسەرتتەرىنە بارلىق بيلەتتەر تەگىن تاراتىلادى. الەمدە تەڭدەسى جوق فەستيۆالدىڭ ەرەكشە قوناقتارى - مۇمكىندىگى شەكتەۋلى جاندار. ۇيىمداستىرۋشىلار ولارعا كونسەرتكە كەلۋى ءۇشىن ارنايى كولىكپەن قامتاماسىز ەتەدى»، - دەلىنگەن ۇيىمنىڭ حابارلاماسىندا.
الەمنىڭ ۇزدىك ساحنالارىن باعىندىرعان تانىمال ونەر جۇلدىزدارى كلاسسيكا، حالىق ونەرى، ەسترادا باعىتىنداعى مۋزىكانىڭ وزىق ۇلگىلەرىن تارتۋ ەتپەك. كونسەرتتەر «قازاقستان» و ك ز، «استانا وپەرا» كامەرالىق زالى، قازۇو ورگان زالى سىندى نۇر- سۇلتاننىڭ ۇزدىك ساحانالارىندا وتەدى.
بيىلعى فەستيۆال قازاقستاننىڭ ەڭ ۇزدىك وپەرا داۋىستارىنىڭ ءبىرى، كوپتەگەن حالىقارالىق بايقاۋلاردىڭ لاۋرەاتى، ق ر ەڭبەك سىڭىرگەن قايراتكەرى مەدەت شوتابايەۆتىڭ بەنەفيسىمەن اشىلماق. كەش قوناقتارى - رەسەي ۇلكەن تەاترىنىڭ جەتەكشى سوليسى اننا اگلاتوۆا، ا. ناۆوي اتىنداعى وزبەك مەملەكەتتىك ۇلكەن تەاترىنىڭ سوليسى، وزبەكستاننىڭ حالىق ءارتيسى راميز ۋسمانوۆ، ماريينسكي تەاترىنىڭ سوليسى ناتاليا پاۆلوۆا.
«4 - ماۋسىمدا كامەرالىق مۋزىكا كەشىندە يتالياندىق جانە قازاقستاندىق ساحنا شەبەرلەرى ونەر كورسەتەدى. يتاليانىڭ اتىنان الەمگە ايگىلى التيست اننا سەروۆا، فورتەپيانو دۋەتى ماركو سكياۆو - سەردجو ماركەدجاني، ال ءبىزدىڭ ەلدىڭ اتىنان ايگىلى پيانيست، «قۇرمەت» وردەنىنىڭ يەسى، «Forte Trio» مەملەكەتتىك تريوسىنىڭ جەتەكشىسى تيمۋر ۋرمانچەيەۆ، كوپتەگەن حالىقارالىق بايقاۋلاردىڭ لاۋرەاتتارى دينارا بازاربايەۆا- ساحامان (سكريپكا) جانە مۇرات ناربەكوۆ (ۆيولونچەل) شىعادى. 5 - ماۋسىمدا سيمفونيالىق مۋزىكاسۇيەر قاۋىم زامانىمىزدىڭ ەڭ تاڭداۋلى پيانيسى بەحزودا ابدۋرايموۆا (وزبەكستان- ا ق ش) جانە ق ر حالىق ءارتيسى ايمان مۇساحودجايەۆا سىندى قوس جۇلدىزدىڭ كونسەرتىنە بارادى»، - دەلىنگەن حابارلامادا.
ورگان كونسەرتتەرىنە بيىلعى 6 - ماۋسىمدا پاريجدەگى اۋليە نيكوليا ديۋ شاردونە شىركەۋىنىڭ ورگانيسى ماري- انەس گرال- مەنە كەلەدى.
فەستيۆال 7 ماۋسىمدا «4 рояль & альт» اسپاپتى كونسەرتىمەن اياقتالادى. يتالياندىق التيست اننا سەروۆا قازاقستاندا تۇڭعىش رەت روبەرتو مولينەلليدىڭ «Lady Walton's Garden» شىعارماسىن ورىندايدى. سونداي- اق بۇل كونسەرتتى اباي اتىنداعى ماوبت بيشىسى نەلسون پەنيامەن جۇپتاسقان ارگەنتينالىق تانگومەن ءتامامدايدى.
بيلەتتەردى «قازاقستان» ورتالىق كونسەرت زالىنىڭ كاسساسىنان تەگىن الۋعا بولادى.
اۆتور: ايان بەكەن ۇلى