ەلباسىنا تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ قۇرمەتتى ءتوراعاسى مارتەبەسى بەرىلدى

نۇر- سۇلتان. قازاقپارات - ەلباسى نۇرسۇلتان نازاربايەۆ تۇركيا رەسپۋبليكاسىنىڭ سىرتقى ىستەر ءمينيسترى ميەۆليۋت چاۆۋشوگلۋمەن كەزدەستى، دەپ حابارلايدى اقوردانىڭ رەسمي سايتى.

كەزدەسۋ بارىسىندا قازاقستاننىڭ تۇڭعىش پرەزيدەنتى باۋىرلاس ەكى ەل اراسىنداعى ىنتىماقتاستىقتى ساقتاۋدىڭ جانە ونى ءارى قاراي نىعايتۋدىڭ ماڭىزدىلىعىن اتاپ ءوتتى.

- تۇركيا بىزگە تاۋەلسىزدىگىمىزدىڭ العاشقى كۇندەرىنەن باستاپ قولداۋ كورسەتىپ كەلەدى. ءبىزدىڭ مەملەكەتتەرىمىز بەن حالىقتارىمىز ءبىر- بىرىنە وتە جاقىن. ەكى ەل اراسىندا ۆيزاسىز رەجىم ەنگىزدىك. قازاقستان مەن تۇركيا قارىم- قاتىناستارى جىل سايىن نىعايىپ كەلەدى. وسى باعىتتىڭ جالعاسا تۇسەتىنىنە سەنىمدىمىن، - دەدى ەلباسى.

سونىمەن قاتار، نۇرسۇلتان نازاربايەۆ تۇركى كەڭەسى اياسىندا مەملەكەتارالىق بايلانىستاردى دامىتۋدىڭ قاجەتتىگىن ايتتى.

- تۇركىتىلدەس مەملەكەتتەردىڭ ىنتىماقتاستىعى كەڭەسى تۇركى حالىقتارىنىڭ اراسىنداعى بايلانىستاردى دامىتۋ جانە نىعايتۋ ماقساتىمەن قۇرىلعان بولاتىن. بۇل جۇمىستاردى جالعاستىرعان ءجون. مەن جان- جاقتى قولداۋ كورسەتەمىن، - قازاقستاننىڭ تۇڭعىش پرەزيدەنتى.

م. چاۆۋشوگلۋ ەلباسىعا ريزاشىلىق ءبىلدىرىپ، رەجەپ ەردوعاننىڭ جاقىن ۋاقىتتا تۇركياعا كەلۋگە قاتىستى شاقىرۋىن جەتكىزدى.

- ءسىزدىڭ ەلباسى، قاۋىپسىزدىك كەڭەسىنىڭ ءتوراعاسى، «Nur Otan»  پارتياسىنىڭ جەتەكشىسى رەتىندە قازاقستان حالقىنىڭ يگىلىگى جولىنداعى جۇمىستاردى بەلسەندى جالعاستىرىپ جاتقانىڭىزعا قۋانىشتىمىز. ءسىزدىڭ قازاقستاندى وركەندەتۋ جانە ەكى جاقتى قارىم- قاتىناستاردى دامىتۋ ىسىنە ولشەۋسىز ەڭبەك سىڭىرگەنىڭىزدى جاقسى بىلەمىز، - دەدى تۇركيا رەسپۋبليكاسىنىڭ سىرتقى ىستەر ءمينيسترى.

كەزدەسۋ بارىسىندا تاراپتار كۇن تارتىبىندەگى حالىقارالىق جانە وڭىرلىك وزەكتى ماسەلەلەردى تالقىلادى.

سوڭىندا تۇركيا رەسپۋبليكاسىنىڭ سىرتقى ىستەر ءمينيسترى تۇركى كەڭەسى مەملەكەتتەرى كوشباسشىلارىنىڭ قابىلداعان شەشىمىنە سايكەس، تۇركى الەمى ەلدەرىن دامىتۋعا زور ۇلەس قوسقانى ءۇشىن نۇرسۇلتان نازاربايەۆقا تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ عۇمىر بويعى قۇرمەتتى ءتوراعاسى مارتەبەسى بەرىلگەنىن مالىمدەدى.