سالىقتىق راقىمشىلىق جىل سوڭىنا دەيىن جالعاسادى

 نۇر- سۇلتان. قازاقپارات - شاعىن جانە ورتا بيزنەس سۋبەكتىلەرى سالىق قارىزىن تولىق تولەگەن جاعدايدا، ايىپپۇل مەن ءوسىمپۇل سوماسىن كەشىرۋ شاراسى جالعاسادى، دەپ حابارلايدى قازاقپارات ءتىلشىسى.

جىل باسىنان بەرى اتالمىش راقىمشىلىققا  37150 سالىق تولەۋشى ءىلىنىپ، 2 ميلليارد تەڭگەگە جۋىق ءوسىمپۇل مەن ايىپپۇل كەشىرىلگەن.

«سالىقتىق راقىمشىلىق اعىمداعى جىلدىڭ سوڭىنا دەيىن جالعاسادى. زاڭناماعا سايكەس تۇزەتۋلەر ەنگىزۋ جوباسى پارلامەنت ماجىلىسىندە قارالىپ جاتىر. قابىلدانعان جاعدايدا راقىمشىلىققا 1 ميلليون 390 مىڭ ادام ءىلىنىپ، 7,0 ميلليارد تەڭگە ءوسىمپۇلدان قۇتىلادى. ول ءۇشىن اتالعان توپ ولارعا 13,9 ميلليارد تەڭگە سوماسىندا نەگىزگى بەرەسىنى تولەۋى كەرەك» ، - دەيدى مەملەكەتتىك كىرىستەر كوميتەتىنىڭ ءتوراعاسى مارات سۇلتانعازيەۆ.

ونىڭ ايتۋىنشا، 2018 -جىلعى 1 - قازانداعى جاعداي بويىنشا ەلىمىزدە  90077 شاعىن جانە ورتا بيزنەس سۋبەكتىسىنىڭ موينىندا وتەلمەگەن سالىقتىق بەرەشەك بولعان. ونىڭ سالىق سوماسى 210,4 ميلليارد تەڭگە، ءوسىمپۇلدار - 122,9 ميلليارد تەڭگە، ايىپپۇلدار - 7,4 ميلليارد تەڭگە شاماسىندا.

 مەملەكەتتىك كىرىستەر كوميتەتى سالىقتىق راقىمشىلىق جىلدىڭ سوڭىنا دەيىن جالعاساتىنىن حابارلايدى. وسىعان وراي، شاعىن جانە ورتا بيزنەس سۋبەكتىلەرىنە جينالعان قارىزدان قۇتىلۋ ارقىلى مەملەكەتتىك كىرىستەر ورگانى قويعان بارلىق شەكتەۋلەردىڭ كۇشىن جويۋعا بولاتىنىن ەسكە سالادى.