استانا سۋ ارناسىنداعى ءتورت قىزمەتكەردىڭ ولىمىنە قاتىستى تەرگەۋ جۇرگىزىلۋدە

نۇر-سۇلتان. قازاقپارات - ەلوردانىڭ پوليتسيا دەپارتامەنتىنىڭ وكىلدەرى «استانا سۋ ارناسى» مەكەمەسىنىڭ ءتورت قىزمەتكەرىنىڭ ولىمىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«23 -مامىر كۇنى ساعات 16.24 كەزىندە باۋىرجان مومىش ۇلى داڭعىلىنداعى «كارىزدىك- سورعىلىق ستانسايا» اۋماعىندا جۇمىس جۇرگىزۋ بارىسىندا 4 قىزمەتكەر بيوگازبەن ۋلانىپ قالعان. اتالمىش فاكت بويىنشا، ق ر قىلمىستىق كودەكسىنىڭ 156-بابى (ەڭبەكتى قورعاۋ قاعيدالارىن بۇزۋ) بويىنشا سوتقا دەيىنگى تەرگەۋ امالدارى باستالدى. قاجەتتى ساراپتاما جۇمىستارى تاعايىندالىپ، سونىڭ ناتيجەسى بويىنشا پروتسەسسۋالدىق شەشىم قابىلداناتىن بولادى»، - دەپ حابارلايدى پوليتسيا دەپارتامەنتىنەن.

ەسكە سالا كەتسەك، نۇر-سۇلتان قالاسىندا 4 ادامنىڭ مەتان گازىنان ۋلانىپ كوز جۇمعانى تۋرالى كەشە حابارلانعان بولاتىن. وقيعا استاناداعى وقۋشىلار سارايىنىڭ ماڭىنداعى قۇدىقتاردىڭ بىرىندە بولعان. ۋلانعانداردىڭ بارلىعى كوز جۇمعان.

قالا اكىمى باقىت سۇلتانوۆتىڭ ايتۋىنشا، تورتەۋى دە - «استانا سۋ ارناسى» كوممۋنالدىق مەكەمەسىنىڭ قىزمەتكەرلەرى.

«ءوزىمنىڭ جانە اكىمدىكتىڭ اتىنان مارقۇمداردىڭ وتباسىنا قايعىرىپ كوڭىل ايتامىن. اكىمدىك بارلىق قاجەتتى كومەكتى كورسەتەدى. ءتيىستى قىزمەتتەرگە ەگجەي-تەگجەيلى تەرگەۋ جۇرگىزىپ، قايعىلى وقيعانىڭ سەبەپتەرىن انىقتاۋدى تاپسىردىم»، - دەپ جازدى قالا باسشىسى Facebook-تەگى پاراقشاسىندا.