تيترى قازاق تىلىنە ساپاسىز اۋدارىلعان فيلمنىڭ پروكات كۋالىگى قايتارىلىپ الىندى
بۇل سۇراققا Facebook-تەگى پاراقشاسىندا مادەنيەت جانە سپورت ءمينيسترى ارىستانبەك مۇحامەدي ۇلى جاۋاپ بەردى، دەپ حابارلايدى قازاقپارات ءتىلشىسى.
ايتا كەتسەك، وسىدان بىرنەشە كۇن بۇرىن الەۋمەتتىك جەلىنىڭ قولدانۋشىلارى كينوتەاترلاردا فيلمنىڭ قازاق تىلىندەگى تيتر ارقىلى بەرىلۋىنە قاتىستى شاعىم بىلدىرگەن ەدى. ولاردىڭ جازۋىنشا، تيتر تىم ساپاسىز اۋدارىلعان. ءتىپتى تيتر ءسوزىنىڭ ىشىندە قازاق تىلىندەگى سوزبەن ارالاس ورىس تىلىندەگى سوزدەر دە ءجۇر.
«كينوكورسەتۋشىلەر فيلمدەردىڭ قازاق تىلىنە اۋدارىلۋىن قامتاماسىز ەتۋ بارىسىندا تۋىنداعان ماسەلەمەن بولىسكىم كەلىپ وتىر. بيىل قابىلدانعان «كينەماتوگرافيا تۋرالى» زاڭعا سايكەس پروكاتتاعى فيلمدەردى تيتر بەرۋ نەمەسە دۋبلياج ارقىلى مەملەكەتتىك تىلگە اۋدارۋدى كينوپروكات قۇقىعىن يەلەنۋشى ديستريبيۋتور قامتاماسىز ەتەدى. مەملەكەتتىك تىلگە كاسىبي دۋبلياج جاسالعان فيلمدەردىڭ سيرەك كەزدەسۋىنىڭ سەبەبىن تۇسىندىرۋدە ديستريبيۋتورلار ونىڭ قىمباتشىلىعىنا سىلتەيدى. دۋبلياجعا جۇمسالعان قارجى فيلمنىڭ قازاقستانداعى كورسەتىلىمىنەن تۇسكەن پايدادان اسىپ ءتۇسۋى مۇمكىن، سوندىقتان كوبىنەسە تيتر ارقىلى اۋدارماعا جۇگىنەدى»، - دەپ جازدى مينيستر.
ارىستانبەك مۇحامەدي ۇلىنىڭ جازۋىنشا، وكىنىشكە قاراي، فيلمدەردى قازاق تىلىنە اۋدارعاندا كەيبىر كينوكورسەتۋشىلەر تاراپىنان قاتەلەرگە جول بەرىلەدى.
«مىسالى، «مۋمباي وتەلى: تايتالاس» فيلمىندە وسى جاعداي كەزدەستى. كورەرمەندەردەن تۇسكەن شاعىمدار نەگىزىندە اتالعان فيلمنىڭ پروكاتقا بەرىلگەن كۋالىگىن الىپ قويۋ تۋرالى شەشىم قابىلدادىق. كينوپروكات قۇقىعىن يەلەنۋشىلەرگە فيلمدەردى مەملەكەتتىك تىلگە گرامماتيكالىق قاتەسىز، ماعىناسىن تۇسىنىكتى ەتىپ، كورەرمەندەردىڭ رەنىشىن تۋدىرمايتىنداي قىلىپ اۋدارۋدى وتىنەمىن. قاتاڭ شارا قولدانعىمىز كەلمەگەنىمەن، «كينەماتوگرافيا تۋرالى» زاڭنىڭ ىسكە اسۋى ءبىز ءۇشىن وتە ماڭىزدى. سىزدەر تۇسىنىستىكپەن قابىلدايدى دەپ سەنەمىن»، - دەدى مينيستر.