اۋعانستان قىرعىزدارى قىرعىزستاننان ازاماتتىق سۇراۋدا

None
None
نۇر-سۇلتان. قازاقپارات - اۋعانستاننان قىرعىزستانعا كەلگەن پامير قىرعىزدارى ازاماتتىق الىپ، تاريحي وتانىندا ءبىرجولا قالعىسى كەلەدى.

قىرعىزستاننىڭ مەملەكەتتىك تىركەۋ قىزمەتى پامير قىرعىزدارىندا ورالمان مارتەبەسى (قىرعىزشا - كايرىلمان) بولعاندىقتان ولاردىڭ جەڭىلدەتىلگەن تارتىپپەن ازاماتتىق الا الاتىنىن ايتادى. الايدا سىرتقى ىستەر مينيسترلىگى پامير قىرعىزدارىنىڭ قىرعىزستانعا ءبىلىم الۋ ماقساتىمەن كەلگەنىن، ازاماتتىق الۋ كەزىندە اۋعانستان ۇكىمەتىمەن تۇسىنبەستىك تۋىنداۋى مۇمكىن ەكەنىن ەسكەرتەدى.

«پاميردە قىرعىزستانعا بارعىسى كەلەتىندەر كوپ»

اۋعانستاننان قىرعىزستاننىڭ نارىن وبلىسىنا كوشىپ بارعان پامير قىرعىزدارى مامىردىڭ 22 سى كۇنى بىشكەكتە وتكەن جيىندا جاڭا ومىرگە بەيىمدەلۋ ءۇشىن قىرعىزستان ازاماتتىعىن العىسى كەلەتىندەرىن جەتكىزدى. ولاردىڭ كيگەن كيىمى، سويلەگەن ءسوزى جەرگىلىكتى تۇرعىنداردان اۋمايتىنى بايقالدى.

نارىندا تۇرىپ جاتقان پامير قىرعىزدارىنىڭ ءبىرى ابدىلۆاحيد جەەنبەك ۋۋلۋ تاريحي وتانىندا قالۋ ءۇشىن قىرعىزستان ​ازاماتتىعىن الۋعا تالپىنىپ وتىرعانىن، ال ەگەر زاڭ مۇمكىندىك بەرسە، اۋعانستان ازاماتتىعىنان دا قالدىرۋدى كوزدەپ وتىرعانىن ايتتى.

- ەگەر ءبىزدىڭ جەرىمىز، تۇراقتى جايىمىز بولسا، توپتاسىپ ءومىر سۇرسەك، جاقسى بولار ەدى. سەبەبى جان-جاقتا جەكە-جەكە تۇرۋ قيىن. نارىندا جۇمىس تاۋىپ، بىرەۋدىڭ ءۇيىن جالعا الىپ، مال باعۋ دا وڭاي ەمەس. ءبارىمىز ءبىر جەرگە قونىستانىپ، كەزەكتەسىپ مال باقساق دەپ ويلاعان ەدىك. ەگەر قىرعىزستان جانە اۋعانستاننىڭ زاڭدارى رۇقسات بەرسە، قىرعىزستان ازاماتتىعىن الساق دەگەن ءۇمىتىمىز بار، - دەيدى ابدىلۆاحيد جەەنبەك ۋۋلۋ.

قىرعىزستانعا كەلگەن پامير قىرعىزدارىنا ورالمان مارتەبەسى بەرىلگەن. قىرعىزستاننىڭ سىرتقى ىستەر مينيسترلىگىنىڭ دەرەگىنشە، بۇل مارتەبە ولارعا اۋرۋحانادا ەم قابىلداپ، ءبىلىم الۋعا، جاڭادان ۇيلەنگەندەرگە نەكە تۋرالى كۋالىك، جاڭا تۋعان نارەستەلەرىنە تۋۋ تۋرالى كۋالىك الۋىنا قۇقىق بەرەدى. بۇعان قوسا، ازاماتتىق الۋ كەزىندە قوسىمشا مۇمكىندىكتەر بەرەدى.

وسىنداي ورالمان مارتەبەسى بار كەيبىر پامير قىرعىزدارى اي سايىن بالالارىنا 1215 سوم (شامامەن 17 دوللار) كولەمىندە - جاردەماقى، كەيبىرى - زەينەتاقى الادى. بۇعان دەيىن قىرعىزستان اۋماعىندا تۋىلعان ءتورت بالاعا مەملەكەت ءبىر رەتتىك جورگەكپۇل بەرگەن.

پامير قىرعىزدارىنىڭ ءبىرى ابدىگافار ابدىراسۋل وزدەرىنە جاسالىپ جاتقان جاعدايعا كوڭىلى تولاتىنىن، قازىرگى كەزدە وزگە دە اۋعان قىرعىزدارى وسى جاققا كەلۋدى جوسپارلاپ وتىرعانىن ايتتى.

- جۋرناليستەر «وسىندا قالاسىزدار ما الدە قايتاسىزدار ما» دەپ ءجيى سۇرايدى. ءبىز مۇندا ءبىرجولا قالعىمىز كەلەدى. تاريحي وتانىمىزدا تۇرۋ ءۇشىن وسى جاققا 11 وتباسى بولىپ، بولەك كەلگەنبىز. قازىر پاميردە قىرعىزستانعا بارعىسى كەلەتىندەر كوپ، - دەيدى ول.

قىرعىزستاننىڭ مەملەكەتتىك تىركەۋ قىزمەتىنە قاراستى حالىقتى تىركەۋ دەپارتامەنتىنىڭ حابارلاۋىنشا، ەتنيكالىق قىرعىزدار قىرعىزستان ازاماتتىعىن جەڭىلدەتىلگەن ءتارتىپ بويىنشا الا الادى. دەپارتامەنت وكىلدەرى ولاردىڭ كەلگەن ەلىنىڭ ازاماتتىعىنان شىقپاۋىنا دا قۇقىعى بار ەكەنىن ايتتى. بۇل اقپاراتتى دەپارتامەنت باسقارماسىنىڭ باسشىسى گۇلبارچىن تۋردۋبايەۆا حابارلادى.

ونىڭ ايتۋىنشا، دەپارتامەنتتىڭ مىندەتى - قۇجاتتاردى جيناپ، پرەزيدەنت جانىنداعى ازاماتتىق ماسەلەلەر بويىنشا كوميسسياعا جونەلتۋ. سوڭعى شەشىمدى سول كوميسسيا قابىلدايدى.

- ەگەر پرەزيدەنتتىڭ ازاماتتىققا قابىلداۋ تۋرالى جارلىعى شىقسا، ەكى اپتا ىشىندە ءتولقۇجات ازىرلەيمىز، - دەيدى گۇلبارچىن تۋردۋبايەۆا.

ال سىرتقى ىستەر ءمينيسترىنىڭ كەڭەسشىسى المازبەك اسانبايەۆ پامير قىرعىزدارىنا قىرعىز ازاماتتىعى بەرىلسە، اۋعانستان بيلىگىمەن تۇسىنبەستىك تۋىنداۋى مۇمكىن ەكەنىن ايتادى.

ونىڭ ايتۋىنشا، پامير قىرعىزدارى تاريحي وتانىنا ءبىلىم الۋ ءۇشىن كەلگەن جانە اۋعانستان ولاردى كەيىنىرەك ەلگە ورالىپ، سونداعى سالالاردى جەتىلدىرۋگە ۇلەس قوسادى دەپ ۇمىتتەنەدى. ەرەسەك ورالمانداردى بالالار مەن جاسوسپىرىمدەرگە باس- كوز بولۋ ءۇشىن بىرگە جىبەرگەن.

- ءاربىر مەملەكەت ءوز ازاماتتارىن ەلىندە قالدىرۋعا تالپىنادى. وعان ەشكىم دە توسقاۋىل جاساي المايدى. ويتكەنى ولار سول مەملەكەتتىڭ ازاماتى. ونىڭ ۇستىنە پامير قىرعىزدارى اۋەل باستا «ەلىمىزگە قايتامىز» دەپ كەلگەن. ەگەر بۇل كەلىسىم بۇزىلسا، اۋعانستان ۇكىمەتى ەتنيكالىق قىرعىزداردى مۇلدە جىبەرمەيتىن بولادى، - دەدى المازبەك اسانبايەۆ.

ديپلومات سونىمەن بىرگە قازىرگى كەزدە اۋعانستانداعى كىشى جانە ۇلكەن پامير اۋماعىندا تۇرىپ جاتقان شامامەن ەكى مىڭ قىرعىزعا گۋمانيتارلىق كومەك كورسەتۋ ماسەلەسى دە قيىنداپ كەتۋى مۇمكىن دەپ بولجايدى.

پاميرلىك قىرعىزداردىڭ باسپانا، جەر الۋ ماسەلەسىن كوتەرىپ، ولاردى مينيسترلىك وكىلدەرىمەن جولىقتىرعان دەپۋتات ايدا يسمايلوۆا بۇل پروبلەمالار ولار قىرعىز ازاماتتىعىن العاندا شەشىلەتىنىن ايتتى.

مەملەكەتتىك كوشى-قون قىزمەتىنىڭ ءتوراعاسى بولوتبەك يبرايمجانوۆ ​پامير قىرعىزدارى عانا ەمەس، جالپى ورالماندار كەزدەسۋى مۇمكىن ماسەلەلەر تۋرالى ايتادى.

- قىرعىزستاندا ورالمان مارتەبەسىن 40 مىڭنان استام ادام العان. ولاردىڭ بارلىعى جەر، باسپانا بەرۋدى تالاپ ەتىپ جاتىر. ولار - اۋعانستان ازاماتتارى. وتكەن جىلى ازاماتتىق الۋ ماسەلەسىن قوزعاماعان ەدى. بيىل ولار ازاماتتىق العىسى كەلەتىندەرىن ايتىپ وتىر. بۇل دۇرىس شەشىم، مەن ونى قولدايمىن. ازاماتتىق العاننان كەيىن ۇكىمەت ولاردىڭ ماسەلەلەرىن شەشىپ بەرەدى، - دەدى ول. ​



پامير قىرعىزدارى. قازان ايى، 2017 -جىل.


2017 -جىلى قازان ايىندا اۋعانستاننان قىرعىزستاننىڭ نارىن وبلىسىنا شامامەن 50 پامير قىرعىزى كەلگەن. 11 وتباسى نەمەسە 49 ازامات نارىندا تۇراقتاپ قالعان. ەكەۋى وشتا وقىپ جاتىر. 2018 -جىلى 18 ەتنيكالىق قىرعىز اۋعانستاننان كەلگەن، تەك بىرەۋى عانا اۋعانستانعا قايتىپ ورالعان.

 دەرەككوز «ازاتتىق»

سوڭعى جاڭالىقتار