ءومىرىڭىزدى جەڭىلدەتەتىن قاراپايىم قاعيدالار

 نۇر-سۇلتان. قازاقپارات - ءبىر اپتا بويى تەك قانا جاياۋ جۇرۋگە تىرىسىپ كورشى.

سوندا ەستە ساقتاۋ قابىلەتىڭنىڭ جاقسارعانىن جانە ءوزىڭنىڭ ۇعىنۋ قاسيەتىڭنىڭ ارتقاندىعىنا كوز جەتكىزەسىڭ.

ەكى اپتا بويى شايدان دا، كوفەدەن دە باس تارت. سوندا سەنىڭ كوڭىلىڭنەن شىقپايتىن نارسەلەر ازايىپ، ۇيقىڭ تىنىشتالعانىنا كوز جەتكىزەسىڭ. جۇزىڭدەگى اجىمدەر ءبىرشاما تەگىستەلىپ، وڭىڭە ءار كىرىپ قالادى.

جاتار ورىنعا 1-2 اپتا تاماقتانباي، اشقارىنعا ۇيىقتاۋعا تىرىس. سوندا سەن ءار ۇيىقتاعان سايىن جارقىن تۇستەر كورىپ، ءار تاڭ سايىن كەرەمەت كوڭىل- كۇيمەن وياناتىن بولاسىڭ. كۇنىڭ دە سونداي كوڭىل- كۇيمەن وتەتىن بولادى.

تاماققا تۇز بەن قارا بۇرىش سالماي ۇيرەن. سوندا 2-3 ەسە تاماق جەۋدى دوعاراسىڭ. وسى ءداستۇردى ساقتاساڭ، 1-2 اپتادا ازداعان ارتىق مايدان ارىلىپ، ءبىر اي ىشىندە ارىقتاپ قالاسىڭ (ارتىق سالماقتان ارىلعىسى كەلگەندەرگە عانا ارنالادى).

دۇكەندەردە ساتىلاتىن گازدى سۋلار مەن كەز كەلگەن ءدامدى سۋسىنداردان باس تارتىپ كورشى. سوندا سەن جاي اۋىز سۋدىڭ بارلىق سۋدان دا ءدامدى ەكەندىگىنە جانە ءشولدى باساتىنىنا كوز جەتكىزەسىڭ.

ءار اداممەن قوشتاسقان سايىن «داۆاي، مەيلى، داۆاي...» دەپ ايتۋدى دوعارىپ كورشى. سوندا سەن اداممەن وسى سوزدەرسىز دە ادەمى قوشتاسۋعا بولاتىنىنا كوز جەتكىزەسىڭ.

ۇناتپايتىن ادامىڭا ونىڭ ەڭ جاقسى كورەتىن سىيلىعىن ۇسىنىپ قويشى. سوندا سەن ونىڭ بۇدان كەيىن ساعان بارىنەن دە ارتىق كوزقاراسپەن قارايتىندىعىنا كوز جەتكىزەسىڭ.

ۇيىقتار الدىندا كوپ ۋاقىتقا ەمەس، ءبىر-ەكى ساعاتقا بولسا دا ينتەرنەت پەن تەلەديداردى ءوشىرىپ تاستاپ، جالعىز قالىپ ميىڭدى تىنىقتىرىپ كورشى. سوندا سەن ءوزىڭنىڭ بويىڭدا دا ايتارلىقتاي شىعارماشىلىق دارىن بارىن بايقايسىڭ.

شىلىم ساتىپ العىڭ كەلگەن سايىن ونىڭ ورنىنا الما، ماندارين، اپەلسين، بانان ساتىپ ال نەمەسە ءبىر ستاقان اۋىز سۋ ءىششى. ەكى اپتادان سوڭ سەن كۇشىڭنىڭ ەكى ەسە ارتقانىن بايقايسىڭ.