داۋرەن ابايەۆ: باسپانا نەعۇرلىم مۇقتاج وتباسىلارعا بەرىلۋى ءتيىس
جاڭا فورماتتاعى اتاۋلى الەۋمەتتىك كومەكتى الۋ ءۇشىن تۇرعىنداردان بۇگىنگە دەيىن 260 مىڭ ءوتىنىش تۇسكەن.
داۋرەن ابايەۆتىڭ ايتۋىنشا، ونىڭ باسىم بولىگى قاناعاتتاندىرىلعان.
«ساۋىردەن باستاپ 185 مىڭ وتباسى اتاۋلى الەۋمەتتىك كومەك الا باستادى. تولەمدەردىڭ جالپى سوماسى 40 ميلليارد تەڭگەنى قۇرادى. قۇجات قابىلداۋ ءالى جالعاسىپ جاتىر. كومەك الۋشىلاردىڭ سان ءوسىپ كەلەدى. بارلىعى 260 مىڭنان استام ءوتىنىش ءتۇستى. سونىڭ كوبى قاناعاتتاندىرىلدى. كەيبىر وتىنىشتەرگە وڭدى شەشىم بەرىلگەن جوق. وكىنىشكە وراي ادامدار تابىسى تۋرالى جالعان انىقتامالار جاساعان. ياعني ادامدار سانالى تۇردە تابىستارىن جاسىرعان» - دەدى مينيستر.
ءمينيستردىڭ ايتۋىنشا، مۇقتاج وتباسىلاردى باسپانامەن قامتۋ 2025-جىلعا دەيىن جالعاسپاق.
«مامىردان باستاپ بارلىق وڭىرلەردە كوپبالالى وتباسىلارعا جالدامالى باسپانا بەرىلە باستادى. ءبارىن ءبىر ۋاقىتتا قامتۋ مۇمكىن ەمەس. باسپانانى بەرۋ ءۇشىن اۋەلى سالۋ كەرەك. بۇعان ۋاقىت كەرەك. مەملەكەت قولداۋدان باس تارتىپ وتىرعان جوق، وزىنەن جاۋاپكەرشىلىكتى العان جوق. 2025-جىلعا دەيىن 40 مىڭ ارەندالىق پاتەر سالىنىپ بىتەدى. سول كەزدە بۇل ماسەلە نەگىزىنەن شەشىلەتىن بولادى» - دەدى داۋرەن ابايەۆ.
اقپارات جانە قوعامدىق دامۋ ءمينيسترى ەلوردا اكىمدىگىنە ءوز تالاپتارىن ايتا كەلگەن ءبىر توپ انانىڭ ماسەلەسىنە كەڭىنەن توقتالدى.
«استانا قالاسىنىڭ اكىمى جانە ەڭبەك جانە حالىقتى الەۋمەتتىك قورعاۋ مينيسترلىگى پيكەتكە شىعۋشى انالاردىڭ تالاپتارىنا تالداۋ جاساعان بولاتىن. بۇل تالاپتار كوپ جاعدايدا ەكى ماسەلەگە كەلىپ تىرەلەدى. ءبىرىنشىسى «باسپانا بەرىڭدەر» دەگەن تالاپ. ەكىنشىسى نەسيەمىزدى كەشىرىپ بەرىڭدەر» دەگەن تالاپ. مەن قازىر كوپ ادامعا ۇنامايتىن وي ايتاتىن شىعارمىن. ماعان كوپ سىن ايتىلاتىن دا شىعار. اشىعىن ايتسام، ماسەلەنى بۇلاي شەشۋ ادىلەتسىز سياقتى. مەنىڭ جەكە پىكىرىمشە، باسپانا نەعۇرلىم مۇقتاج جانۇيالارعا بەرىلۋى كەرەك. مۇمكىندىگى شەكتەۋلى بالاسى بار، جالعىزباستى انالار وتە اۋىر جاعدايدا ءومىر ءسۇرىپ جاتىر. باسپانا سونداي وتباسىلارعا بەرىلۋى كەرەك. اتا-اناسى جۇمىسقا قابىلەتتى، تولىمدى جانۇيالارعا مەملەكەت ءوز ءىسىن اشۋعا پايىزسىز نەسيە بەرەدى. مەملەكەت ولارعا بيزنەس الىپپەسىن ۇيرەتۋگە دايىن. ءتىپتى باستاپ تا كەتتى»، - دەگەن مينيستر قوستاناي وبلىسىنىڭ تۇرعىنىن مىسالعا كەلتىردى.
«مەن الدىڭعى كۇنى عانا قوستانايدان كەلدىم. سونداعى جۋرناليستەر ماعان ءبىر ايەل تۋرالى ايتىپ بەردى. گۇلسارا الماعامبەتوۆا كوپبالالى انا. ول بيزنەس باستاۋ جولدارىن وقىپ، 3 ميلليون تەڭگە نەسيە الىپتى. ول قارجىعا بىرنەشە باس سيىر ساتىپ العان. قازىر سول سيىرلارىن ساۋىپ، ءسۇتىن ساتىپ وتىر. كەلەشەكتە مال باسىن كوبەيتپەكشى. بۇكىل ءۇي ءىشى سول بيزنەستى جۇدىرىقتاي جۇمىلىپ جۇرگىزىپ جاتىر. مەملەكەتتىڭ كوپبالالى وتباسىلاردى وسىنداي جولمەن قولداۋى الدەقايدا ءتيىمدى، الدەقايدا دۇرىس دەپ ويلايمىن. بۇل سول جانۇيالاردا ءوسىپ جاتقان بالار ءۇشىن دە پايدالىراق»، - دەدى ول.
ءمينيستردىڭ ايتۋىنشا، كەيبىر ازاماتتاردىڭ نەسيەسىن جابۋعا مەملەكەتتىڭ مۇمكىندىگى جوق ەمەس. دەسە دە، بۇل قوعامداعى وزگە ساناتتاعى ازاماتتاردىڭ قۇقىعىن شەكتەۋى مۇمكىن.
«بىرەۋلەر كۇن سايىن بانك الدىنداعى مىندەتىن ورىنداۋ ءۇشىن تالماي ەڭبەكتەنەدى. ول ءۇشىن ەشقانداي كومەك نەمەسە سۋبسيديا الىپ جاتقان جوق. ولاردىڭ دا بالالارى، ولاردىڭ دا مۇقتاجدىعى بار ەمەس پە. ولاردىڭ دا كوبىنىڭ باسپاناسى جوق. مەملەكەت ولارعا بىرەۋلەرگە نەسيەنى كەشىرىپ، بىرەۋلەرگە كەشىرمەگەنىن قالاي ءتۇسىندىرۋى كەرەك»، - دەدى داۋرەن ابايەۆ.