كوپبالالى انالارعا كومەكتەسۋ دە ساۋاپ ءىس - داۋرەن ابايەۆ
ءمينيستردىڭ ايتۋىنشا، ءدىن تاقىرىبىنداعى مەدياونىم قازاقستان قوعامىندا ۇلكەن سۇرانىسقا يە.
«حالىق ءدىنتانۋشى مەن يمامداردان، كاسىبي مامانداردان ءدىن تاقىرىبىنداعى سان قىرلى ساۋالدارعا جاۋاپ العىسى كەلەدى. ءدىني سالت-جورالعىلاردىڭ ءمانىن تەرەڭىرەك تۇسىنگىسى كەلەتىندەر دە كوپ. مىسالى، كوپ ادامدار يمامداردان ساۋاپ ۇعىمىن ءتۇسىندىرۋدى سۇراپ جاتادى. ەل اراسىندا ساۋاپ الۋ ءۇشىن تەك مەشىت نەمەسە مەدرەسە سالۋ كەرەك دەگەن تۇسىنىك بار. ءدىن وكىلدەرىنىڭ ءوزى ساۋاپقا اعاش وتىرعىزۋ، مەكتەپ نەمەسە جول سالۋ سياقتى يگى ىستەر دە جاتاتىنىن ايتادى. ولاردىڭ پىكىرىنشە، اۋەلى اينالاداعى ادامداردىڭ مۇقتاجدىعى ەسكەرىلۋى ءتيىس. كوپبالالى انالارعا كومەكتەسۋ دە ساۋاپتىڭ ءبىر ءتۇرى» - دەپ تۇيىندەدى مينيستر.
ەسكە سالساق، داۋرەن ابايەۆ بۇعان دەيىن دە ءدىن تاقىرىبىندا پىكىر بىلدىرگەن بولاتىن.
«زاڭدى جۇمىس ىستەپ جاتقان ءدىني بىرلەستىكتەرمەن قازىرگى تاڭدا وسىناۋ پوزيتيۆتى تاجىريبەنى بەكەمدەپ، ىنتىماقتى، كونسترۋكتيۆتى ءوزارا ارەكەتتى كۇشەيتە بەرۋ كەرەك. بىزگە ءدىنتانۋ ساراپتاماسىن جۇرگىزۋدىڭ تيىمدىلىگىن ءاردايىم ارتتىرىپ وتىرۋ كەرەك دەپ ەسەپتەيمىز. بۇل جەردە ءدىني مازمۇنى بار ءبىلىم جانە اقپاراتتىق ماتەريالداردى كونستيتۋتسياعا جانە زاڭعا ساي كەلۋىن تەكسەرۋ تۋرالى ايتىلىپ وتىر»، - دەگەن ەدى مينيستر.