اقمولا «جۇلدىزدارى» بايقاۋىنىڭ جۇلدەگەرلەرى اۆتوكولىك ءمىندى
شاراعا ايماق باسشىسى ەرمەك مارجىقپايەۆ قاتىسىپ، ۇزدىك ونەرى مەن شىعارماشىلىق جەتىستىككە قول جەتكىزگەن سالا قىزمەتكەرلەرىن قۇتتىقتادى.
«ءبىزدىڭ ءوڭىر ءارقاشاندا ءوزىنىڭ باي مادەني مۇراسىمەن جانە دارىندارىمەن داڭقتى. مادەنيت سالاسىنىڭ قىزمەتكەرلەرى مەن ارداگەرلەرى ەلىمىزدىڭ گۇلدەنۋى مەن دامۋىنا، ادامگەرشىلىك پەن ىزگىلىك قۇندىلىقتاردى ساقتاۋعا ولشەۋسىز ۇلەس قوسۋدا»، - دەدى ەرمەك مارجىقپايەۆ سوزىندە.
وبلىستا «اقمولا جۇلدىزدارى» بايقاۋىن وتكىزۋ داستۇرگە اينالعان. وندا ونەرپاز، انشىلەر مەن بيشىلەردىڭ قاتارى جىل سايىن جاڭا دارىنداردىڭ ەسىمىمەن تولىعا ءتۇسىپ، وبلىستىڭ شىعارماشىلىق ءومىرىنىڭ دامۋىنا ۇلەس قوسۋدا. بيىلعى ونەر دوداسىنا وبلىستىڭ 211 اۋىلدىق وكرۋگىنەن 50 مىڭنان استام ادام قاتىسىپ وتىر. 110 جاڭا شىعارماشىلىق ۇجىم مەن 151 جاڭا ءانشى انىقتالدى.
شارادا 60 تان استام مادەنيەت سالاسى مەن شىعارماشىلىق ينتەللەگەنتسيا وكىلدەرى «ەڭبەك ارداگەرى» مەدالى، «ۇزدىك ولكەتانۋشى» مەن «مادەنيەت سالاسىنىڭ ۇزدىگى» ءتوس بەلگىلەرى جانە قۇرمەت گراموتالارىمەن ماراپاتتالدى. ولاردىڭ اراسىندا اقمولا وبلىستىق ورىس دراما تەاترىنىڭ ءارتىسى ۆيكتور كرىلوۆ، اقىن سازگەر يران تاسقارا، استاراحان اۋداندىق مادەنيەت ءۇيىنىڭ جەتەكشىسى سۆەتلانا پەسوتسكايا، ۇكىلى ىبىراي اتىنداعى اقمولا وبلىستىق فيلارمونياسىنىڭ «گاككۋ» ءبي ءانسامبلىنىڭ بالەتمەيستەرى گۇلميرا وردابايەۆا بار.
«اقمولا جۇلدىزدارى» وبلىستىق بايقاۋىنىڭ قورىتىندىسى بويىنشا ۇزدىك شىعارماشىلىق جەتىستىكتەرى ءۇشىن ستەپنوگورسك، بۋراباي جانە ارشالى اۋداندارى ءبىرىنشى ورىنعا يە بولدى. ولارعا وبلىس اكىمى دىبىس جازۋ اپپاراتۋراسىن سىيلادى. ال، گران-پري جۇلدەسىنە كوكشەتاۋ، ەسىل جانە سەلينوگراد اۋداندارىنىڭ شىعارماشىلىق ۇجىمدارى لايىق دەپ تانىلىپ، اۆتوكولىككە يە بولدى.
ايتا كەتەيىك، وبلىستا 257 كلۋب، 370 كىتاپحانا، 11 مۇراجاي، 2 تەاتر، ۇكىلى ىبىراي اتىنداعى اقمولا وبلاستىق فيلارمونياسى، وبلىستىق مادەنيەت جانە حالىق شىعارماشىلىعى ورتالىعى، تاريحي-مادەني مۇرانى قورعاۋ جانە پايدالانۋ ورتالىعى جۇمىس ىستەيدى. سوڭعى 3 جىل ىشىندە مادەنيەت سالاسىندا 46 نىسان جوندەلدى. بيىلعى جىلى 7 نىسانعا جوندەۋ جۇمىستارى جوسپارلانعان. قازىرگى كەزدە، وبلىستىق ەكى مۇراجاي قالپىنا كەلتىرىلۋدە. سونداي-اق، «ۇلى دالانىڭ جەتى قىرى» باعدارلاماسى شەڭبەرىندە ءبىرجان سال، اقان سەرى، بالۋان شولاق، ۇكىلى ىبىراي جانە كەنەسارى سياقتى ۇلى تۇلعالارعا ەسكەرتكىش ورناتۋ جوباسى جۇزەگە اسىرىلۋدا.