تارازدا كوپ كىتاپ وقىعان وقۋشى ميلليونەر اتاندى
ول «كىتاپ وقىپ، ميلليونەر بول!» قالالىق بايقاۋىندا جەڭىسكە جەتىپ، 1 ميلليون تەڭگەنى جەڭىپ الدى.
تاراز قالالىق «جامبىل-تاراز» گازەتى ۇيىمداستىرعان بايقاۋ بەس ايعا سوزىلىپ، شىن مىقتىلار ىرىكتەلگەن. جوبا شارتى بويىنشا اقىلداستار القاسى قۇرىلعان.
«اقىلداستار القاسى بىرلەسىپ وتىرىپ، 100 كىتاپتان تۇراتىن ءتىزىمدى جاسادىق. ونىڭ تەڭ جارتىسى قازاق، قالعانى ورىس تىلىندە ۇسىنىلدى. بايقاۋ جاس ەرەكشەلىكتەرىنە قاراي ەكى كەزەڭدە ءوربىدى. 5-7- سىنىپ وقۋشىلارى كەمىندە 15، 8-11- سىنىپ وقۋشىلارى كەمىندە 20 كىتاپتى وقۋ جىلىنىڭ سوڭىنا دەيىن وقىپ شىعۋى ءتيىس بولدى. جەڭىمپازدار وقىلعان كىتاپتار بويىنشا سۇراق قويۋ ادىسىمەن انىقتالدى»، - دەيدى اتالمىش قالالىق گازەتتىڭ باس رەداكتورى ەلميرا مىرزا-عالي.
بايقاۋدىڭ قورىتىندىسى تاراز قالالىق مادەنيەت ۇيىندە وتكەن شارادا جاريالاندى. بايقاۋ ناتيجەسى بويىنشا 8-11- سىنىپتار ارالىعى بويىنشا ب. مومىش ۇلى اتىنداعى 45№ قازاق كلاسسيكالىق گيمنازياسىنىڭ 9-سىنىپ وقۋشىسى قازىنا ابدىسەيىت 1- ورىندى جەڭىپ الىپ، 1 ميلليون تەڭگەلىك جۇلدەگە يە بولدى. ال، كەرىمباي اتىنداعى 12№ مەكتەپ گينازياسىنىڭ 10-سىنىپ وقۋشىسى ايگەرىم مەيىرحانوۆا Ⅱورىندى (500 مىڭ تەڭگە)، 7№ مەكتەپ گيمنازياسىنىڭ 11-سىنىپ وقۋشىسى گالينا بۋركينا Ⅲ ورىندى (250 مىڭ تەڭگە) يەلەندى.
5-7- سىنىپ ارالىعىنداعى قاتىسۋشىلار اراسىنان ي. پانفيلوۆ اتىنداعى 39№ مەكتەپ-گيمنازياسىنىڭ 7-سىنىپ وقۋشىسى ايزەرە ەرەن جەڭىمپاز اتانىپ، 500 مىڭ تەڭگەنى يەلەندى. سونداي-اق، 10№ ورتا مەكتەبىنىڭ 7-سىنىپ وقۋشىسى دانيار بەكجان مەن 54№ ورتا مەكتەبىنىڭ 6-سىنىپ وقۋشىسى توعجان اللابەرگەن Ⅱورىندى (150 مىڭ تەڭگەدەن) ءوزارا بولىسسە، 30№ مەكتەپ گيمنازياسىنىڭ 7-سىنىپ وقۋشىسى سابينا سۇلەيمەن مەن 31№ ورتا مەكتەبىنىڭ 5-سىنىپ وقۋشىسى گيۋزال وسمانوۆا Ⅲ ورىنعا (75 مىڭ تەڭگەدەن) لايىق دەپ تابىلدى.
ايتا كەتۋ كەرەك، جالپى جۇلدە قورى 3 ميلليون تەڭگەنى قۇراعان بايقاۋدىڭ نەگىزگى ماقساتى - بالالاردى كىتاپ وقۋعا باۋلۋ بولىپ تابىلادى. ۇيىمداستىرۋشىلار بايقاۋدىڭ اۋماعىن كەڭەيتىپ، ءداستۇرلى تۇردە وتكىزۋدى جوسپارلاپ وتىر.