قۇقىق بۇزعان شەتەلدىكتەر مىندەتتى تۇردە ەلدەن شىعارىلماق

None
None
نۇر- سۇلتان. قازاقپارات - قازاقستان اۋماعىندا قۇقىق بۇزعان شەتەلدىكتەردى مىندەتتى تۇردە ەل اۋماعىنان شىعارۋ ۇسىنىلىپ وتىر.

بۇل تۋرالى ادىلەت مينيسترلىگىندە زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا ق ر باس پروكۋرورىنىڭ ورىنباسارى بولات دەمبايەۆ ءمالىم ەتتى، دەپ حابارلايدى قازاقپارات ءتىلشىسى.

«بىزدە ميگراتسيالىق اعىن وتە كوپ جانە قازاقستانعا كەلەتىن شەتەلدىكتەردىڭ قاراسى قالىڭ. ولاردىڭ اراسىندا قۇقىق بۇزۋشىلىققا جول بەرگەندەر جاۋاپقا تارتىلىپ، ايىپپۇل تاعايىندالادى. كەيىننەن ولار وسى ايىپپۇلدى تولەمەگەنى جانە ەل اۋماعىنان شىعارىلماعانى انىقتالادى»، - دەدى ب. دەمبايەۆ ءتيىستى زاڭ جوباسىنىڭ تۇجىرىمداماسىن تانىستىرۋ بارىسىندا.

سوندىقتان قالىپتاسقان تاجىريبەنى ەسكەرە وتىرىپ، ەلدەن تىسقارى شىعارۋ نەگىزگى ءارى قوسىمشا جازا رەتىندە بولۋى كەرەك دەگەن شەشىم قابىلداندى.

«ياعني شەتەل ازاماتى قۇقىق بۇزۋشىلىققا جول بەرسە، ونى ءبىزدىڭ مەملەكەتتەن شىعارىپ جىبەرۋ تۇرىندەگى مىندەتتى جازا ەسكەرىلىپ وتىر»، - دەپ ءتۇسىندىردى باس پروكۋروردىڭ ورىنباسارى.

ايتا كەتەيىك، بۇگىن كوميسسيا وتىرىسىندا قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جانە قىلمىستىق- پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسىنىڭ تۇجىرىمداماسى قارالدى. وسى ورايدا قىلمىستىق زاڭنامانى جەتىلدىرۋ اياسىندا ءبىرقاتار جاڭالىقتار ەنگىزىلىپ وتىر.

اۆتور: رۋسلان عابباسوۆ

سوڭعى جاڭالىقتار