قازاقستاندا «الاددين» فيلمىنىڭ كەيىپكەرلەرى قازاق تىلىندە سويلەدى
رەجيسسەر گاي ريچچيدىڭ «الاددين» وتباسىلىق ميۋزيكلى - جوبا اياسىندا گولليۆۋدتىق تۋىندىلاردى قازاق تىلىندە دۋبلياجدالعان 29- فيلمى رەتىندە سانالادى.
فيلمنىڭ سيۋجەتى بويىنشا، الاددين اتتى جاس ۇرى جاسمين حانشايىمعا ۇيلەنۋ ءۇشىن حانزادا بولعىسى كەلەدى. ال، اگرابا ءۋازىرى دجافار قالانى باسىپ العىسى كەلىپ، عاجايىپتار ۇڭگىرىندە ساقتاۋلى تۇرعان سيقىرلى شامدى الۋعا تىرىسىپ باعۋدا. ول ۇڭگىرگە جۇرەگى تازا، «قىرلانباعان الماز» دەپ اتالاتىن ادام عانا كىرە الادى جانە بۇنداي ادام - ءدال وسى الادديننىڭ ءوزى.
بارىمىزگە بەلگىلى، «الاددين» مۋلتفيلمى 1992 -جىلى «ۇزدىك ءان» جانە «ۇزدىك بىرەگەي ساۋندترەك» نوميناتسيالارىندا ەكى «وسكار» جۇلدەسىنە يە بولعان.
فيلمنىڭ دۋبلياجدالۋىنا نۇر- سۇلتان مەن الماتىنىڭ 50-دەن استام اكتەرلەرى كاستينگكە قاتىسقان. ايگىلى اكتەر داۋرەن سەرگازين - جىندى، ال ءانشى جانە اكتەر نۇرلان ءالىمجانوۆ - دجافاردى داۋىستادى. فيلمنىڭ دۋبلياجدالۋىنا 10-نان استام كاسىبي اكتەر جۇمىس ىستەدى.
«جىندى دىبىستاۋ ماعان بۇيىردى(اعىلشىن تىلىندە جىننىڭ داۋىسىن ۋيلل سميتت دىبىستاعان). بۇل وتە قيىن وبراز، سەبەبى جىن مىڭ قۇبىلمالى كەيىپكەر. الەمگە اتاقتى فيلمدەردىڭ قازاق تىلىندە ۇلكەن ەكرانداردا كورسەتىلۋى ءبىزدى قۋانتادى»، - دەدى اكتەر داۋرەن سەرگازين.
سونداي- اق، «ۋولت ديسنەي» ستۋدياسىنىڭ قازاقشا دۋبلياجدالعان «الاددين» فيلمىنىڭ قايىرىمدىلىق كورسەتىلىمىندە الماتى قالاسىنىڭ اكىمى باۋىرجان بايبەك قاتىستى.
«دۋبلياج بويىنشا العاشقى جوبا كەزىندە ەلباسى نۇرسۇلتان ءابىش ۇلى نازاربايەۆ باتاسىن بەرگەن. بۇگىنگى كۇنى «وزىڭنەن باستا» الەۋمەتتىك جوباسى كورەرمەندەردىڭ دە، ەل بيزنەسىنىڭ دە جۇرەگىنەن ايشىقتى ورىن الدى. اتاقتى تۋىندىلار انا تىلىمىزدە دىبىستالۋى مەملەكەتتىك ءتىلدىڭ الەمگە تانىلۋىنا، دامۋىنا جەتكىزەدى»، - دەدى الماتى قالاسىنىڭ اكىمى باۋىرجان بايبەك.
«الاددين» 23 - مامىردان باستاپ قازاقستاندىق كينوتەاترلاردا كورسەتىلەدى.
اۆتور: گۇلميرا عوسمانالي