قاسىم-جومارت توقايەۆ جازۋشىلار وداعىنىڭ ءتوراعاسى ۇلىقبەك ەسداۋلەتتى قابىلدادى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ قازاقستان جازۋشىلار وداعىنىڭ ءتوراعاسى ۇلىقبەك ەسداۋلەتتى قابىلدادى، دەپ حابارلايدى قازاقپارات اقورداعا سىلتەمە جاساپ.

قازاقستان پرەزيدەنتىنە ادەبيەتتىڭ قازىرگى جاعدايى مەن دامۋى، جازۋشىلار وداعىنىڭ اتقارعان جۇمىستارى جانە الداعى جوسپارى جونىندە مالىمەت بەرىلدى.

سونىمەن قاتار جازۋشىلار وداعىنىڭ ءتوراعاسى  ۇلىقبەك ەسداۋلەت بيىل ەلىمىزدە وتەتىن ازيا ەلدەرى قالامگەرلەرىنىڭ فورۋمىنا دايىندىق ماسەلەسى جايلى باياندادى.

قاسىم-جومارت توقايەۆ ۇلتتىق رۋحاني الەۋەتتى ىلگەرىلەتۋ ىسىندە اقىن-جازۋشىلار قاۋىمى ماڭىزدى ءرول اتقاراتىنىن اتاپ ءوتتى.

سوڭىندا مەملەكەت باسشىسى جازۋشىلار وداعىنىڭ جۇمىستارىنا جوعارى باعا بەرىپ، قالامگەرلەرگە شىعارماشىلىق تابىس تىلەدى.