08:13, 24 - مامىر 2019 | GMT +6
پرەزيدەنتتىڭ قىزى باسپا ءسوز قىزمەتتەرىنە شۇيلىكتى
نۇر-سۇلتان. قازاقپارات - وزبەكستان پرەزيدەنتى شاۆكات ميرزيەيەۆتىڭ ۇلكەن قىزى سايدا ميرزيەيەۆا باسپا ءسوز قىزمەتتەرى مەن سول سالادا جۇمىس ىستەيتىندەردى سىنعا الدى دەپ حابارلايدى ورتالىق ازيانىڭ جاڭالىقتار قىزمەتى.
سايدا ءساۋىر ايىندا اقپارات جانە بۇقارالىق بايلانىس اگەنتتىگى ديرەكتورىنىڭ ورىنباسارى قىزمەتىنە كەلدى.
ول Facebook پاراقشاسىندا شەتەل تاجىريبەسى مەن مامانداردىڭ پىكىرىن العا تارتىپ، وزبەكستانداعى باسپا ءسوز قىزمەتى تومەن دەڭگەيدە ەكەنىن جەتكىزدى.
«باسپا ءسوز قىزمەتى جەتەكشىلەرىنىڭ كوبىسى بۇقارالىق اقپارات قۇرالدارىمەن جۇمىس ىستەۋ قاجەتتىگىن تۇسىنبەيدى. حالىق ەلدە بولىپ جاتقان رەفورمالاردى جەتكىلىكتى بىلە بەرمەيدى. پرەزيدەنت پەن ۇكىمەت قابىلداپ جاتقان شەشىمدەر حالىققا دۇرىس جەتىپ جاتقان جوق. اقپارات دۇرىس جەتپەگەندىكتەن حالىقتا ەكى جاقتى پىكىر قالىپتاسادى»، - دەدى ميرزيەيەۆا.
ول باسپا ءسوز قىزمەتىنىڭ جۇمىسىنا بايلانىستى قوسىمشا قۇقىقتىق-نورماتيۆتىك قۇجات قابىلداۋ كەرەكتىگىن اتاپ ءوتىپ، بۇل باعىت بويىنشا جۇمىستاردىڭ باستالىپ كەتكەنىن دە ايتتى.