ساۋدا ورىندارى بەرەتىن چەكتەر ادامدى وبىر مەن قانت ديابەتىنە شالدىقتىرادى

  نۇر- سۇلتان. قازاقپارات - ساۋدا ورىندارى بەرەتىن چەكتەر ادام اعزاسىندا وبىر مەن قانت ديابەتىنىڭ ورشۋىنە اكەپ سوعادى.

 ونداعان جىل بويى الىپ جۇرگەن تۇبىرتەكتىڭ وسىنداي زيانى تۋرالى ماماندار ايتۋدا. الايدا، ءدال قازىرگى ۋاقىتتا بۇل دايەك ەلەكتروندى چەككە كوشۋ جاعىنا مۇددەلىلەردىڭ ماركەتينگتىك قادامى دا بولۋى مۇمكىن.

ال سالىق ورگاندارى قاۋىپتى تۇبىرتەك ءۇشىن 100 سمارتفون سىيلاۋعا ءازىر، دەپ حابارلايدى ەۆرازيا ارناسى.

كەلەسى جىلدان باستاپ بارلىق ساۋداگەرلەر مەن قىزمەت كورسەتۋشىلەر كاسسالىق اپپاراتتارىن ونلاين جۇيەگە بەيىمدەۋى ءتيىس. ونداي مۇمكىندىگى جوقتار جاڭادان قۇرىلعى الۋى شارت. زاڭ تالابى وسى. بولماسا ايىپپۇل تولەۋگە تۋرا كەلەدى. ءبىرى جاڭا اپپارات ىزدەپ جۇرسە، ءبىرى ەسكىسىن دە ءالى دۇرىس قولدانىپ ۇلگەرمەگەن.

- انداعى سول كوروبكادا جاتقان كۇيى جاتادى ما سوندا؟ -

- جاتادى.

 - ءبىر ايدا ءبىر ادام سۇراسا، سۇرايدى، سۇراماسا ول دا جوق. نە كەرەگى بار ونىڭ؟ قانشاما ادامدى قيناپ، وسىنى الدىرىپ جاتىر. مىنانىڭ قانشا تۇراتىنىن بىلەسىڭ بە؟ 65 مىڭ قۇرىعاندا قازىر سونداي بولىپ العان بۇل، - دەدى ساۋداگەر نۇركەن اقانبەك.

"كاسسوۆىي اپپاراتقا ءبىز ۇيرەنىپ قالعانبىز. ونلاينعا كوش دەپ جاتىر. كوشۋىمىز كەرەك قوي زاڭدى تۇردە. ەندى ۇكىمەتكە ەشكىم قارسى تۇرا المايدى عوي"، - دەدى ساۋداگەر.

 ەلوردادا شامامەن 64 مىڭنان اسا كاسسالىق اپپارات قولدانىلىپ جاتىر. جارتىسىنان كوبى ياعني، 39 مىڭنان استامى ءالى ونلاين جۇيەگە كوشپەگەن. ماماندار اياق استىنان كۇندەلىكتى قولدانىستاعى چەكتىڭ اسا ءقاۋىپتى ەكەنىن ايتا باستادى.

كاسسالىق اپپاراتتان شىعاتىن چەك وبىر مەن قانت ديابەتىنە سەبەپشى بولۋى مۇمكىن ەكەن. ويتكەنى، قاعاز قۇرامىندا زياندى زات بار كورىنەدى. بۇعان دەيىن نەگە ول تۋرالى جارياعا جار سالىپ ايتىلماعانى جۇمباق. بالكىم ونلاين كاسساعا ءوتۋدى جەدەلدەتۋدىڭ ءبىر جولى شىعار.

ەسكى اپپاراتتىڭ ءىشىن اقتارىپ، ونلاين جۇيەگە قوسۋعا بولادى ەكەن. ءبىراق قۇرىلعىلاردى ساتاتىندار جاڭاسىن العان تيىمدىرەك بولادى دەيدى.

 "بۇل كاسسالاردىڭ بۇل دەگەن تەك ءبىر- اق ءتۇرى ءبىر 70 مىڭنان باستالادى. پروشيۆكانى اۋىستىرۋ؟ پروشيۆكانى اۋىستىرۋ شامامەن 40 مىڭ تەڭگەدەي بولادى"، - دەيدى جوبا مەڭگەرۋشىسى رلان احمەتوۆ.

ونىڭ ۇستىنە تالاپ بويىنشا چەكتە QR- كود بولۋى شارت. ەلىمىزدە قازىر جاڭا جوبا قولعا الىنىپتى. وعان چەك بەرۋ ءۇشىن اپپاراتتى ساتىپ الۋدىڭ قاجەتى جوق. سمارتفونعا ارنايى قوسىمشا جۇكتەپ، ايىنا 3 مىڭ تەڭگە تولەپ وتىرۋعا دا بولادى.

 "نالوگوۆيدان رەگيستراتسيا جاسايدى، قازىر بارلىعى ونلاين تۇردە جۇرگىزىلەدى. تەگىن؟ تەگىن. نالوگوۆيدان رەگيستراتسيا جاساۋ كەرەك، سوسىن وفد دەگەن بار. وپەراتور فيسكالنىح داننىح، سول جەردەن رەگيستراتسيا جاساۋ كەرەك. 2018 -جىلدىڭ 1 - قاڭتارىنان باستاپ، ەلەكتروندى تۇردە بەرۋگە بولادى. كاسىپكەرلەر وسىندا فيسكالنىي چەكتى جاساپ، ۆاتساپقا، ەلەكتروننىي پوچتاعا جىبەرە الادى"، - دەدى جوبا مەڭگەرۋشىسى.

جاڭا ۇلگىدەگى كاسساعا كوشۋدى ىنتالاندىرۋ شاراسى بۇل. مەملەكەتتىك كىرىستەر كوميتەتى دەمەۋشىلەردىڭ كومەگىمەن چەك تالاپ ەتكىش ازاماتتارعا 100 كۇندە 100 سمارتفون سىيلايمىز دەپ وتىر. ۇتىسقا يە بولعانداردىڭ ءبىرى قاراپايىم كاسسا قىزمەتكەرى. ءۇش مىڭ تەڭگەگە ساۋدا جاساپ، گادجەتتى يەمدەندى.

" ءبىرىنشى سەنبەدىم. قايتالاپ سۇرادىم. ىلە ماعان كوميتەتتەن حابارلاسىپ ايتتى. سول كەزدە ەكىنشى قوڭىراۋدان كەيىن سەندىم"، - دەيدى قالا تۇرعىنى.

جاڭا جۇيەدەن كاسىپكەرلەر دە كوپ پايدا كورەدى دەيدى سالىقشىلار.

 "مۇنىڭ جاقسىلىعى، مۇنىڭ كەرەكتىگى نەدە؟ بارلىق سالىق تولەۋشىلەر ونلاين كاسسالىق اپپاراتقا كوشكەننەن كەيىن ولاردا كاسسالىق اپپاراتتى قولدانۋ، قولدانباۋ جونىندەگى رەيدتىك تەكسەرۋلەر جۇرگىزىلمەيدى ونداي كىسىلەرگە"، - دەدى مەملەكەتتىك كىرىستەر دەپارتامەنتى باسشىى قۇلمۇحانبەت يساقوۆ.

ەكولوگتار ەسكى اپپاراتتى قوقىسقا تاستاماۋعا كەڭەس بەرەدى. ودان كەلەر زالال اۋىر ەكەن. اپپارات ساتۋشىلار ونى اۋىستىرىپ، جاڭاسىن جەڭىلدىكپەن بەرۋگە ءازىر.