جاڭا وقۋ جىلىنان باستاپ مەكتەپتەردە جاڭا ءپان ەنگىزىلەدى
شاحمات فەدەراتسياسىنىڭ مالىمەتىنشە، بايقاۋ جەڭىمپازدارى وقۋلىقتارمەن بىرگە بۇكىل تەحنيكالىق قۇرال-جابدىقپەن قامتىلادى.
«1 -ناۋرىز بەن 7 -ءساۋىر ارالىعىندا قازاقستاندا وسى باعدارلامانى جۇزەگە اسىرۋ ءۇشىن بايقاۋ وتكىزىلدى. بارلىعى 111 ءوتىنىش ءتۇسىپ، ساراپشىلار كەڭەسى ءبىر اي بويى ءار كانديداتۋرانى مۇقيات قارادى»، - دەيدى جوبانىڭ مەنەدجەرى سالتانات نوعايبالانوۆا، - بايقاۋدىڭ سىيلىق قورىندا نوۋتبۋكتەر، كولونكالار، كوپفۋنكسيالى قۇرىلعى، پروەكتور، شاحمات تاقتاسى مەن فيگۋرالارى، ساعاتتار جانە كوركەمدىك ماتەريالدار بولدى. بۇدان بولەك، قازاقستان شاحمات فەدەراتسياسى باستاۋىش سىنىپتارعا ارنايى ازىرلەگەن ادىستەمەلىك قۇرالدار مەن وقىتۋ باعدارلاماسى مەكتەپتەرگە بەرىلەدى».
بۇگىندە بۇل باعدارلاما الماتى، پاۆلودار، قىزىلوردا جانە شىمكەنت قالالارىنىڭ 2 مىڭنان استام وقۋشى ءبىلىم الاتىن 44 مەكتەبىندە جۇزەگە اسىرىلعان. ماتەريالدى يگەرۋ وڭاي بولۋى ءۇشىن ارنايى وقۋلىقتار قۇراستىرىلىپ، 85 باپكەر مەن 41 مەكتەپ پسيحولوگى دايىندىقتان ءوتىپتى. شاحماتتىڭ بالالارعا ىقپالىن تەكسەرۋ ماقساتىندا 22 مەكتەپتە تاجىريبە جۇرگىزىلىپ، وعان باستاۋىش سىنىپتىڭ 1700-دەن استام وقۋشىسى قاتىسقان.
«مەكتەپتە شاحمات ۇيرەتۋ - فەدەراتسيانىڭ باسىم باعىتتارىنىڭ ءبىرى، - دەيدى قازاقستاننىڭ شاحمات فەدەراتسياسىنىڭ اتقارۋشى ديرەكتورى يرينا گريشەنكو، - جاڭا وقۋ جىلىندا باعدارلاما قازاقستاننىڭ 34 قالاسى مەن اۋىلىنداعى 84 مەكتەپتە جۇمىس ىستەيتىن بولادى. بايقاۋعا رەسپۋبليكانىڭ بارلىق وبلىسى قاتىسقانى وتە قۋانتارلىق جايت. ماسەلەن، پاۆلوداردان 20 ءوتىنىش كەلىپ تۇسكەن».
بايقاۋدا جەڭىسكە جەتكەن مەكتەپتەر ەلدىڭ 30 قالاسى مەن اۋىلىندا ورنالاسقان: كوكشەتاۋ، اقتوبە، تەمىر، اتىراۋ، الماتى، نۇر-سۇلتان، شىمكەنت، شۋ، جەزقازعان، قاراعاندى، قارقارالى، تەمىرتاۋ، قوستاناي، قىزىلوردا، اقتاۋ، ەكىباستۇز، پەتروپاۆل، ارىس قالالارى مەن بالقاش، كۇرشىم، ۋۆاروۆو، قۇلان، بورسەڭگىر، اقتوعاي، كوكتوبە، چەرنورەتسك، ەڭبەكشى، ەڭبەكتۋ، شامالعان اۋىلدارى.