سۋ استىنا كەتكەن قالالار

None
None
 نۇر - سۇلتان. قازاقپارات - اتموسفەراداعى كومىرقىشقىل گازىنىڭ كونسەنتراتسيانىڭ ءوسىمى الداعى 80  جىلدا ورتاشا اۋا تەمەراتۋراسىن بەس گرادۋسقا جوعارىلاتۋى مۇمكىن.

BBC  باسىلىمى ا ق ش جانە  ۇلىبريتانيا عالىمدارىنىڭ زەرتتەۋىن جاريالادى. عالىمدار الداعى 80 جىلدا ورتاشا اۋا تەمپەراتۋراسى 5 گرادۋسقا ارتىپ، ادامزات وركەنيەتىنە ەلەۋلى اسەر ەتەدى دەپ بولجاۋدا. اۋا رايىنىڭ جوعارىلاۋى دۇنيەجۇزىلىك مۇحيتتى 62 مەن 238 سانتيمەتر ارالىعىندا كوتەرىلۋىنە سەبەپ بولىپ، 1,79 ميلليون شارشى مەتر اۋماقتى سۋ باسادى. ال بۇل ايماقتا 187 ميلليون ادام تۇرادى. گرەنلانديا مۇزدىقتارىنىڭ ەرۋى الەم مۇحيتىنىڭ كوتەرىلۋىنىڭ باستى سەبەبى بولماق. وعان قوسا، انتاركتيدانىڭ باتىس جانە شىعىس ايماقتارىنداعى مۇزدىقتار دا تولىق جويىلۋدىڭ الدىندا تۇر. ەگەر اتالعان مۇزدىقتار ەريتىن بولسا ويپاڭ جەردە ورنالاسقان  ۇلى بريتانيا، ا ق ش، ەۋروپا مەن ازيانىڭ كوپتەگەن مەملەكەتتەرىنىڭ اۋماقتارى سۋ استىنا كەتۋى مۇمكىن. ءىرى وزەندەردىڭ ساعاسىندا ورنالاسقان قالالارعا دا ەداۋىر قاۋىپ ءتونىپ تۇر. دەگەنمەن عالىمداردىڭ بولجاۋىنشا تابيعاتتىڭ بۇلاي قۇبىلۋى تەك %5  دى قۇرايدى. ال تاريحتا سۋ استىنا كەتكەن قالالار جەتەرلىك. سولاردىڭ بەسەۋىنە توقتالىپ وتسەك.

دانۆيچ

 دانۆيچ قالاسى XI عاسىردا انگليانىڭ ەڭ ءىرى قالالارىنىڭ ءبىرى بولعان. XIII جانە XIV عاسىردا بولعان تەڭىز داۋىلىنىڭ سالدارىنان قالانىڭ جاعالىق سىزىعى ءبۇلىنىپ، قالا سۋ استىنا كەتتى. ونداعان جىلدار بويى دانۆيچ تۇرعىندارى قالا سۋ استىنا قالماس ءۇشىن قورعانىش عيماراتتارىن تۇرعىزعان. الايدا بۇل كومەكتەسپەدى.

كەكوۆا

تۇركيادا ورنالاسقان ارال II عاسىردا بولعان جەر سىلكىنىسىنىڭ ناتيجەسىندە سۋ استىنا كەتكەن. ارالدىڭ سولتۇستىگىندە دوليحيستە قالاسى ورنالاسقان. قالا ءوز زامانىندا دامىعان ەلدى- مەكەندەردىڭ ءبىرى بولعان. ارحەولوگتار ەكى- ءۇش قاباتتى ۇيلەردى، مونشالاردىڭ، سۋ جيناۋعا ارنالعان سيستەرنالاردىڭ جانە كارىز جۇيەسىن تاپقان.

 شىنجىن

 قىتايدىڭ جىجياڭ پروۆينتسياسىندا ورنالاسقان شىنجىن سۋ ەلەكتر ستانتسياسىن تۇرعىزۋ بارىسىندا جەر بەتىنەن جويىلىپ كەتكەن. سەس قۇرىلىسى كەزىندە بوگەت جاسالىپ، ونىڭ تۇبىندە شيچەن قالاسى قالىپ قويعان. بۇدان بولەك 27 قالاشىق، 1377 اۋىل جانە مىڭداعان ۇيلەر سۋ استىندا قالعان. وسىنىڭ سالدارىنان 300 مىڭ قالا تۇرعىنى ۇيلەرىن تاستاپ، باسقا قالاعا كوشۋگە ءماجبۇر بولعان.

 باي

 نەاپولدان 16 شاقىرىم ماڭدا ورنالاسقان باي ەجەلدى ريم يمپەرياسىنىڭ اقسۇيەكتەرى جينالاتىن قالاسى بولعان. تابيعاتى ادەمى، سۋى ءمولدىر قالاعا ءريمنىڭ اقسۇيەكتەرى مەن باي- شونجارلارى كەلۋدى ۇناتاتىن. الايدا قالا سەيسميكالىق بەلسەندى جەردە ورنالاسقاندىقتان بىرنەشە قۋاتتى جەر سىلكىنىسىنەن سوڭ سۋ استىنا كەتكەن.

گەراكليون

 اڭىزعا سەنسەك، مىسىردىڭ قاقپاسى سانالعان گەراكليون قالاسى ءنىل وزەنىنىڭ ساعاسىندا ورنالاسقان. 3 مىڭ جىل بويى سۋ استىندا جاتقان قالادا باي- شونجارلار مەن اقسۇيەكتەر تۇرعان. ءىرى عيماراتتار مەن قازىنانىڭ كوپ بولعانى سونشالىق، قالا ورنالاسقان جەر سالماقتى كوتەرە الماعان.

Massaget.kz

سوڭعى جاڭالىقتار